Mga angay buhaton aron malikay sa sakit

nga dengue, gipahinumdom sa PHO

TAGBILARAN CITY, Bohol, September 14 (PIA)--Gipahinumdoman sa Provincial Health Office (PHO) ang katawhan sa mga angay buhaton aron malikay sa sakit nga dengue.

Kini tungod sa padayong pagsaka sa mga kaso sa dengue sa Bohol diin nisaka og 1,204 porsiyento sa unang tulo ka kwarter sa 2022 kon itandi sa samang panahon sa niaging tuig.

Base sa datos sa PHO, ang mga kaso sa dengue sa probinsiya gikan Enero 1 hangtod Septiyembre 11, 2022 nisaka ngadto sa 1,956 gikan sa 150 lamang ka kaso sa samang panahon sa miaging tuig.

Usa ang natalang namatay sa parehas nga panahon sa 2021 ug 2022.

Matud pa ni Leonidas Saniel, ang dengue program coordinator sa PHO, ang “complacency” sa mga residente nga mihunong sa pag-obserbar sa anti-dengue measures sama sa pagmintinar sa maayong panimalay ug community hygiene ang hinungdan sa padayong pagsaka sa mga kaso sa dengue sa lalawigan.

“Same sa atong gi mention sauna, naa gyud gihapoy pagka gahi og ulo ning mga taw, bisa’g unsaon og remind,” pamahayag pa ni Saniel atol sa tigom sa mga miyembro sa Association of United Development Information Officers (AUDIO-Bohol) niadtong Setyembre 8, 2022.

Si Saniel nagkanayon nga daling masumpo ang dengue infections kon ang mga komunidad mag-obserbar sa preventive measures sama sa 4S, ang estratehiya sa departamento sa panglawas batok sa pagkaylap sa maong sakit.

Ang plano sa 4S naglakip sa pagpangita ug pagguba sa mga lugar nga gipasanay sa lamok, pagsiguro sa pagpanalipod sa kaugalingon, pagpangita og sayo nga konsultasyon, ug pagsuporta sa fogging ug pag-spray sa mga hotspot nga lugar.

Gi-awhag niya ang katawhan sa paggawas sa ilang tagsa-tagsa ka nataran matag alas 4 sa hapon matag adlaw aron pagguba sa mga lugar nga itlogan sa mga lamok. Kini tungod kay matud pa moangay man mangitlog ang mga lamok sa alas 4 sa hapon.

Angay usab nga tabunan ang tanang mga sudlanan og tubig, ipangkob ang tanang naghayang nga mga sudlanan sama sa lata, botilya ug uban pa aron dili kapangitlogan sa lamok ug kinahanglang magbinantayon ang tanan batok sa sakit nga dengue.

Giawhag ni Saniel ang publiko sa pag-obserbar sa “high index of suspicion,” buot ipasabot kinahanglang magpatambal ang mga ginikanan o guardian kon ang hilanat sa ilang anak molungtad og kapin sa duha ka adlaw. (ecb/PIA7-Bohol)

Atol sa tigom sa mga miyembro sa Association of United Development Information Officers (AUDIO-Bohol) niadtong Setyembre 8, 2022, gibutyag ni Leonidas Saniel, ang dengue program coordinator sa PHO nga ang “complacency” sa mga residente nga mihunong sa pag-obserbar sa anti-dengue measures sama sa pagmintinar sa maayong panimalay ug community hygiene ang hinungdan sa padayong pagsaka sa mga kaso sa dengue sa Bohol. (ecb/PIA7-Bohol)