EO alang sa usa ka tuig nga moratorium sa pagbayad

og utang sa mga mag-uuma, gilagdaan ni PBBM

TAGBILARAN CITY, Bohol, September 14 (PIA)--Gituman ni Presidente Ferdinand “Bongbong” Marcos Jr. ang iyang gisaad sa iyang unang State of the Nation Address (SONA) nga himuong gawasnon na sa mga utang ang mga agrarian reform beneficiaries (ARB).

Kini human gilagdaan ni Pangulong Marcos ang usa ka executive order nga nagpahamtang og usa ka tuig nga moratorium sa pagbayad sa tinuig nga amortisasyon ug pagbayad og interes sa mga ARB alang sa mga yutang agrikultural nga gipangapod-apod ubos sa Comprehensive Agrarian Reform Program (CARP).

Gilagdaan sa Pangulo ang maong EO dungan sa pagsaulog sa iyang ika-65 nga adlaw’ng natawhan, Martes, Setyembre 13.

Matud pa sa Pangulo nga ang usa ka tuig nga moratorium sa land amortization ug pagbayad og interes makatabang sa pagtangtang sa abagahon sa mga ARB gikan sa ilang mga utang, nga maghatag og dalan kanila nga gamiton ang salapi sa pagpaugmad sa ilang mga basak, pahimoslan ang ilang kapasidad sa paghimo ug magsulong sa paglambo sa ekonomiya.

Si Department of Agrarian Reform (DAR) Kalihim Conrado Estrella III namahayag nga ang executive order sa moratorium agi og pagpangandam sa bag-ong katumanan sa gisaad sa Pangulo, nga mohangyo sa Kongreso sa pagpalabang og balaod nga tanggalon na ang mga utang sa ARB nga may mga wala pa nabayrang amortisasyon ug interes.

Nagpahayag si Estrella og kaandam sa pagkooperar sa House of Representatives sa pag-amyenda sa Section 26 sa Republic Act 6657, o ang Comprehensive Agrarian Reform Law ng 1988.

“Ang condonation ng umiiral na agrarian reform loan ay sasakupin ang halagang PhP58.125 bilyon kung saan makikinabang ang humigit-kumulang 654,000 ARBs at kinasasangkutan ng kabuuang 1.18 milyong ektarya ng mga lupang naipamahagi,” matud pa sa pahayag ni Marcos sa iyang unang SONA.

Ang Seksyon 26 sa Republic Act 6657 nagmando sa mga ARB nga nahatagan og yuta sa pagbayad sa Land Bank of the Philippines sa 30 tinuig nga amortisasyon sa unom ka porsyentong interes matag tuig.

Matud pa ni Pangulong Marcos nga ubos sa balaodnon, ang mga pautang sa mga ARB nga may wala nabayrang amortisasyon ug interes dili na singlon ug papason na ang mga wala pa nabayrang utang sa mga mag-uumang benepisyaryo sa repormang agraryo.

“Ang mga ARB na tatanggap pa rin ng kanilang mga iginawad na lupa sa ilalim ng CARP ay tatanggap nito nang walang obligasyon na magbayad ng anumang amortisasyon,” matud pa ni Marcos. (ecb/PIA7-Bohol)

Gilagdaan ni Presidente Ferdinand R. Marcos Jr. ang executive order nga magpahamtang og usa ka tuig nga moratorium sa amortization ug pagbayad sa interes aron matabangan ang mga mag-uuma nga dili mabug-atan ug tugotan sila nga magtutok sa produktibidad. Matod pa sa Department of Agrarian Reform, kini nga lakang gipaabot nga makabenepisyo sa 654,000 ka agrarian reform beneficiaries. (PIA)