Creative content creators’

gitapok sa AYO-Tagbilaran

TAGBILARAN CITY, Bohol, March 21, (PIA) –Sa tinag-as nga panglantaw nga kapahimuslan sa Bohol ang iyang creative industry, gidala sa mga tigpasiugda ang AYO Roadshow dinhi sa Tagbilaran sa milabay nga semana.

Usa sa mga kalihukan sa Creative Content Creators of the Philippines (SIKAP), ang AYO Roadshow nagtumong sa pagtapok sa mga tighimo og mga mamugnaon nga content sa Pilipinas aron sumpayon ang hikot sa tinabangay sa matag usa samtang pangandaman ang labing una nga original content festival sa sunod buwan.

Niadtong Marso 10, gitapok sa AYO kauban sa Department of Trade and Industry (DTI) ang mga nailhang content creators sa Bohol aron makapakita sa unsay ilang mga nahimo, ikapaambit ang ilang mga sugilanon, ilang musika, arte, animation, comics, dinibuho, mga duwa nga masawhan sa internet.

Niini, milaum ang mga tigpasiugda nga kini maghatag og dugang aghat sa mga content creators, magbayloay sa mga kasayuran kabahin sa intellectual property ug pagtinabagnay o collaboration sa mga proyekto.

Ang Ayo Roadshow maoy gihimong agianan sa SIKAP aron iduso ang pagpalapad sa digital creative industry ug paghatag sa hawanan para sa mga local content creators alang sa negosyo ug pag-ila-ila sa mga possible nga ilang kapangayoan og tabang samtang nagtanyag sa ilang mga hinimo ngadto sa merkado nga nanginahanglan niini.

Niini, mahimong mapalig-on ang industriya sa original creative content sa Bohol ug magtabang sa mga creators sa paghangop sa kaimportante sa originality ilabi na sa paghimo og kaugalingon nga brand ug kinaiya.

Sa tabang sa SIKAP, nga usa ka non-profit organization nga naglangkop sa mga creative individuals, studios ug mga institusyon, ug sa DTI, ang AYO magatabang sa mga content makers sa pagmugna, pag-ugmad, ug pagpapusa sa mga orihinal nga creative content aron kini magamit ug makita sa tibuok kalibutan sa mga nangita niini.

Ang SIKAP naghatag usab og mga tambag ug suporta sa mga nagsige pa og mugna sa ilang nagkadaiyang creative Intellectual properties sama sa animations, online games, film, comics, illustrations ug musika.

Tumong usab sa SIKAP ang pag-agak sa iyang mga kaalyado aron makahimo sa kaugalingong creative content, pagpagawas niini aron mahalin sa kalibutan.

Pinaagi sa AYO roadshow, nagtuo ang SIKAP nga sa ilang paghatag og dugang gahum ug katakus sa mga creative content creators gamit ang saktong mga himan ilabi na sa pagdumala sa intellectual property ug pagpalisensya niini, mabuksan sa Pilipinas ang sunod nga lawak nga mahimong makapadagan sa ekonomiya sa sunod nga mga tuig. (rahc/PIA-7/Bohol)

MA-AYO NGA PANELISTS. SIla Sherwin Sapong (photography), Elvin Vitor (visual arts), Ben Skelton (online games), Maryel Clerio (graphic artist) ug Christian Naparota (film) ang lima sa mga Bol-anon nga creative content creators nga mipaambit sa ilang sugilanon, kasinati-an, ug kinabuhi isip artist atul sa AYO roadshow sa Tagbilaran agi og pangampanya alang sa rehiyonal nga creative content creators expo sa Sugbo sa sunod buwan. (rahc/PIA-7/Bohol)