Livestock carriers gikan sa Sugbo,

taman sa pantalan sa Bohol lang

TAGBILARAN CITY, Bohol, March 21, (PIA) – Taman sa pantalan lang gihapon ang mga trak nga gisakyan sa mga hayop nga mosulod sa Bohol.

Kini samtang nagpadayon nga gidid-an sa Bohol ang pagpasulod sa buhi nga baboy, karne ug mga pagkaon nga giproseso gikan sa karneng baboy, labi na kon gikan sa Sugbo ug mga silingang lalawigan nga apektado sa African Swine Fever (ASF).

Kini usab subay sa Executive Order No 11. Series of 2023 nga gipagawas ni Gobernador Erico Aristotle Aumentado, Marso 7, 2023.

Sa Section 2 sa nahisgutang Executive Order, giingon didto nga ang pagpasulod sa mga sakyanan nga gikargahan sa bisan unsa nga mga kargamento gikan sa Sugbo ug sa Cebu City, igo lamang nga makatungtong sa mga pantalan sa Bohol ug dili na makagawas pa sulod sa lalawigan sa Bohol ug Tagbilaran hangtud nga mobalik na sa ilang gigikanan.

Niini, ang tanang mga kargamento nga karga niini gikan sa barko, kinahanglang kuhaon sa mga kagconsign niini aron dili na mogawas pa ang dayo nga sakyanan.

Kini kay matud pa sa mga pagtuon, ang kagaw nga kinaingnan sa ASF, mahimong mosakay sa ligid o sa mga parte sa sakyanan nga nakasaghid sa kagaw, hugaw sa baboy ug dugo niini samtang didto pa sa Sugbo.

Kini maoy usa ka possible nga hinungdan nga makasulod ang sakit sa Bohol.

Dala niini, guhot usab nga gipatuman sa Bohol ang pagbantay ilabi na sa mga pantalan, gamit ang mga iro nga mosimhot sa mga bagahe aron walay karne o productong karne sa baboy nga makasulod sa Bohol. (PIA-7/Bohol)

BASTA GIKARGAHAN SA MANANAP. Sanglit may posibilidad nga kini nga mga sakyanan nagagikan sa mga farms sa Sugbo nga naapektohan sa ASF, gilatid sa Executive Order No 11 nga dili sila mahimong mogawas sa pantalan gawas lamang kong ikarga nag balik sa barko pauli sa Sugbo. Kini aron pugngan ang pagsulod sa sakit dinhi. (rach/PIA_7/Bohol)