Gawas kon masugba na sa kalayo,

Tangke sa LPG, dili dali mobuto

TAGBILARAN CITY, Bohol, March 23, (PIA) –Ayaw biya-i ang nagsiga nga tangke sa Liquified Petroleum Gas (LPG), gani, kinahanglan mo kini nga mapawong sa dili pa motalikud aron mangayo’g tabang.

Ang gibiyaan nga nagsiga nga tangke sa LPG, kon dili lang makaangin sa ubang masunog, mapawong ra kini kon mahurot na ang sulod sa tangke, kini matud sa mga tinugyanan sa Bureau of Fire Protection (BFP), sa buwan sa Pagpugong sa Sunog.

Magkinahanglan pa og tumang kainit ang nagleak nga tangke sa gas aron mobuto, mao nga samtang wala pa kini nadagkotan nga butang nga dali ra’ng masunog, ayaw biyai, hinuon, palunga ang kalayo.

Kini maoy tambag ni Fire Officer 1 ug Community Relations Officer Ronel Lofranco, didto sa Fire Prevention Briefing nga gitanyag sa BFP City Fire Marshal’s Office ngadto sa mga sakop sa Association of United Development Information Officers (AUDIO Bohol) nga nag Bisita Opisina didto sa City Hall, Marso 23.

Si FO1 Lofranco maoy naghatag sa briefing sa mga sakop sa AUDIO Bohol didto sa City Disaster and Risk Reduction Management Operations Center sa Dao, ning Dakbayan sa Tagbilaran.

Matud ni Lofranco, daghan ang matarantar kon makakita nga nagsiga ang tangke sa LPG nga inay palungon ang kalayo, modagan na hinuon.

Dugang niya, dili madali og buto ang tangke sa LPG, gawas lamang kon madagkotan na ang tibuok palibot niini, ug gani, mahimo nga mahurot lang ang sulod sa tangke nga nagleak , dili makabuto ang tangke, dason niya.

Hinuon, samtang nagsiga ang leak sa tangke sa LPG, kon kini makadagkot sa ubang combustible o sayon masunog nga mga butang, kini na maoy mahimong suliran ilabi na kon kusog na ang kalayo.

Simple lang, matud niya samtang iyang gipakita atul sa usa ka demonstration ang pagpawong sa nag leak nga tangke sa LPG.

Unang paagi, lisoa lamang ang lisoanan nga nagkontrolar sa pagpagawas sa gas gikan sa tangke, ug kay mawala na ang sugnod niini, dayag lamang nga mapawong ang kalayo, saysay niya.

Ikaduha, kon mahadlok gyud nga mohikam sa liso-anan sa tangke, magkuha og daku nga noog, ug maoy ibunal sa nagsiga nga tangke, aron mapawong kini.

Ikatulo, mahimo usab nga gamit ang baga nga noog, takloban ang tangke ug ilibud ang noog aron mawad-an sa oxygen ang kalayo ug mapawong na.

Mas sayon ang pagpawong sa sunog kon masabtan ang tulo ka element sa kalayo, dugang niya.

Una: sugnod. Kon may sugnod nga mahimong kadagkotan, mahimo kini nga masunog, ilabi na kon anaa usab ang ikaduhang element: ang Oxygen. Ikatulo ang Chemical reaction nga maoy sinugdanan sa kalayo.

Pahinumdom sa BFP niining buwan sa pagpugong sa sunog: Sa pag-iawas sa sunog: hindi ka nag-iisa. (PIA-7/Bohol)

AYAW BIYAI. Kon may higayon nga nagsiga na ang tangke sa LPG tungod sa maggawas nga gas, dili kini dali nga mobuto ug tungod sa pressure sa naggawas nga gas, dili makasulod ang kayo aron makabuto ang tangke. Hinuon, kon ang nagsiga nga tangke makasunog sa ubang butang hangtud nga mapalibutan kini sa kalayo, ang di na mapugngan nga kainit sa tangke maoy makapabuto niini. (PIAbohol)