NGCP nahostage sa ERC

Dala sa kontrata sa AS

TAGBILARAN CITY, Bohol, March 25, (PIA) – Nagapos ang kamot sa National Grid Corporation of the Philippines (NGCP) sa paghimog aksyon sa pagkuwang sa supply sa koryente, hinungdan sa kalitkalit nga brown-outs.

Kini kay samtang nagpadayon pa ang kompanya sa proseso sa pagbidding sa mga mohatag sa ancilliary services (AS) niini human natapos na ang mga kontrata sa mga suppliers sa koryente.

Karon, samtang nagpadayon pa ang pagtimbang sa mga bids, nangayo ang NGCP sa Energy Regulatory Commission (ERC) sa binuwan nga extension sa mga kontrata sa ancilliary services aron bisan kon wala pa matibawas ang bidding, dili mapakgang ang serbisyo sa panuga dala sa kakuwang sa supply.

“Daghan sa mga kasabutan sa AS sa NGCP, paso na.

Niini, naghimo ang NGCP sa binuwan nga pag-inat sa mga napaso na nga kasabutan, aron maseguro nga may temporary nga maghulip sa kakuwangon samtang nagpadayon ang proseso sa pagprocure sa serbisyo,”pasabut sa NGCP.

Apan, dugang sa ahensya, sa pagdumili sa ERC sa gihimo nga binuwan nga extensions a paso nga kontrata samtang nagpaabut nga i-award na sa winning bidder ang kontrata, magkuwanggyud ang koryente.

Gipasabut sa NGCP nga ang Philippine Transmission Grid mahimo gayud nga ulipon sa brown-outs gikan sa artificial nga panginahanglan sa AS kay kon wala ang AS nga extension, dili makahimo si NGCP sa pagtumbok sa mga planta nga maoy magahatg og koryente hulis sa kakuwangon.

Apan, human gitapos sa NGCP ang pagdawat ug pagbukas sa mga bids alang sa Anciliary Services sa Luzon niadtong Marso 14, Visayas niadtong Marso 15 ug Mindanao niadtong Marso 16, nagdumili na ang ERC sa paghatag sa mge extension sa nahupas na nga kontrata, mao nga kuwang gayud ang supply.

Matud sa NGCP, kasamtangan pa nilang gitimbang ang mga bids ug gilauman nga ikahatag na ang kontrata ngadto sa midaug nga bidder sa Abril 18 pa.

Segun pa usab sa NGCP, ang Ancillary Services Procurement Agreements (ASPA) nga resulta niining competitive selection process (CSP) moagi pa usab sa ERC.

Uban sa regulatory processes nga kinahanglan nga agi-an sa susama nga mga applications, mahimo nga ang provisional approval alang sa bag-o nga ASPAs nga linugdangan sa AS CSP, mahimong maabtan pa sa Hunyo 2023 ayha pa mapagawas ang serbisyonga gipangita sa kontrata.

Ang AS magasuporta sa NGCP sa pagpakutay sa gahum dagitab gikan sa mga planta ngadto sa mga komsumidor aron magpabilin ang kasaligan nga pagpadagan niini. Kini mahinungdanon aron madumala sa NGCP ang nagsakakanaug nga supply sa koryente aron maseguro nga dekalidad ug kasaligan ang nagkutay nga koryente nga dili makadaut sa mga sensitibong nga kagamitan o sa mas daku nga automatic load dropping (ALD) kon ang pagsugwak-kunhod sa supply, igo na nga makabutang sa kinatibuk-ang sistema sa pagkadaut.

NIini, nagpahibaw na ang NGCP ngadto sa Department of Energy (DOE) sa suliran aron makapatunga kini ug maghusay sa gubot nga sistema aron kalikayan na ang power interruptions. (PIA-7/Bohol)