ASF Exec Order No. 12

Lawog nga makasulod sa Bohol,

gikan lang sa ASF-free nga lugar

TAGBILARAN CITY, Bohol, March 25, (PIA) –Wala nay lawog sa baboy, giproseso man o himoonon pa, nga kuhaon gikan sa mga lalawigan nga natumbok sa tukma nga ahensya sa kagamhanan nga apektado sa African Swine Fever (ASF).

Kini maoy unod sa Executive Order No 12, series of 2023 nga gilagdaan ni Gobernador Erico Aristotle Aumentado niadtong Marso 14, samtang gipahugtan pa gyud sa Bohol ang iyang depensa batok sa paghukoy sa pagsulod sa ASF.

Hinuon, sa nasampit nga ordinansa, ug taliwala sa nag-ping-it na

nga mga mamuhi-ay og baboy dinhi sa Bohol tungod sa nagkanihit nga lawog sa baboy hinungdan sa pagmahal niini, gilagda na ang estrikto nga pagpatuman sa pagpasulod sa lawog sa baboy.

Gikan lamang sa mga luwas nga lugar: mga lalawigan, syudad ug lungsod nga natumbok nga Free Zone, kadtong napabag-o ang klasipikasyon, protected zone, surveillance zone ug buffer zone segun sa klasipikasyon sa Bureau of Animal Industry (BAI) sa ilang labing lab-as nga zoning status sa Luzon, Visayas ug Mindanao, ang gigikanan sa mga lawog nga makasulod sa Bohol, segun sa order.

Gani, giseguro sa mandu sa gobernador nga walay suliran kon ang lawog, magagikan sa Palawan, Occidental Mindoro, Oriental Mindor, Negors Oriental, Negros Occidental ug sa Siquijor.

Gani, kadtong mga truck, wingvans ug mga sakyanan nga gikargahan sa mga lawog, didto na idiskarga kay, segun sa order, dili na makagawas sa pantalan sa ilang pag-abut sa Bohol ang sakyanan, hangtud nga ikakarga na usab sa barko pagawas sa Bohol.

Ipatuman usab ang kwarantina sa mga lawog nga mosulod sa Bohol, segun sa order sa Gobernador.

Kon ang lawog nga mingsulod, anaa sa sirado nga container van, iagi man sila sa 11 ka adlaw nga kwarantina inig abut, malakip sa kwenta sa 11 ka adlaw sa iyang pagbyahe, basta dili maablihan ang container vans.

Kadtong mga lawog nga gikarga sa mga bukas nga tarima, estrikto nga 11 ka adlaw nga kwarantina ug dili pa kini madisplay ug magamit hangtud sa paglabay sa 11 ka adlaw. (rahc/PIA-7/Bohol)

MAS MAAYO ANG IRO MAOY MOSUBAY. Segun sakasinatian sa mga k9 handlers, mas maayo kon ang iro mismo maoy mosubay sa mga bagahe nga karga sa mga barko gikan sa Sugbo kay sa gunitan ang iro ug molabay lamang sa iyang atubangan ang kargamento. Kini samtang gipalig-on sa Bohol ang pagbantay nga dili masudlan sa kagaw nga kina-ingan sa ASF. (PIABohol)