Youth wemboree sa DRRM

CCAM, BIDA dinhi sa Bohol

TAGBILARAN CITY, Bohol, March 25, (PIA) –Ipahigayon sa Department of Interior and Local Government ang youth Disaster and Risk Reduction Management (DRRM) ug Climate Change Adaptation and Management (CCAM) jamboree subay sa Operation Listo sa nahisgutang ahensya dinhi sa Bohol, didto sa Panglao, Marso 29-31.

Gi-ila nga Wemboree ubos sa pagpahapsay sa kapasidad sa local nga kagamhanan kabahin sa pagtubag sa DRRM-CCAM, ang panagtapok sa mga kabatan-onan subay sa Operation Listo, apilan usab sa symposium sa Buhay Ingatan, Druga Ayawan (BIDA), matud ni DILG information officer Sarah Kristina Romanillos.

Usa ka panagtapok sa mga kabatan-onan nga naggikan sa mga nagkadaiyang komunidad, tunghaan ug mga kahugpungan nga nagahousa sa us aka tumong, ang Wemboree tuyo nga magpausa sa dagan sa hunahuna sa tawo gikan sa “ako,” ngadto na sa “Kita.”

Tutokan sa Wemboree dinhi sa Bohol ang programa nga naga adbokasya sa pagpalig-on sa pagka-andam sa usa ka LGU sa pagtubag ug pagpangandam batok sa katalagman, ginamit ang gihiusa nga mga kahinguhaan sa mga ahensya.

Unang bahin sa Oplan Listo ang Listo nga kagamhanang Lokal nga gilusad niadtong 2014 nga nagpahimong institusyon sa mga sumbanan sa pagpangandam sa katalagman, pagtubag niini u gang pagmonitor sa mag pamaagi niini.

Dinhi namugna ang Oplan Listo Disaster Preparedness manual alang sa paggiya sa mga LGUS sa pagpangandam ug pagtubag sa katalagman.

Gawas sa DRRM-CCAM, ilakip usab sa Wemboree sa Bohol ang anti-illegal drugs campaign nga nailhang “Buhay Ingatan, Droga’y Ayawan” (BIDA).

Nakasunod sa programa sa presidente ug sa iyang saad nga ipadayun ang kampanya batok sa illegal nga drugas subay sa balaod ug pagtamud sa tawhanong katungod nga nagtutok sa pagpahiuli sa biktima ug sa paglantaw sa socio-economic development.

Segun pa sa DILG, ang BIDA nagtapok sa mga labing piskay nga programa sa milabay nga mga tuig ug magtutok sa pagpakunhod sa panginahanglan sa illegal nga drugas o demand reduction.

Ug sanglit ang suliran sa drugas nagasukad sa kakuwang sa pagpanarbaho, edukasyon, suporta sa pamilya, kini maoy tutokan aron mapaubos ang panginahanglan, matud pa ni SILG Abalos.

Ang BIDA nangiahanglan usab sa suporta sa local government units, mga kaabag nga ahensya sa goberno, katawhan nga may kalambigitan sa kawsa ug mga kahugpungan aron makab-ut ang epektibong pagpakunhod sa panginahanglan sa makabuang nga drugas.

Sa Wemboree, mag-indigay usab sa labing makahuloganon nga poster, scavenger hunt alang sa mga gikinahanglan sa paglikas sa katalagman, paghimo sa mga pasiunang lakang pagluwas sa kinabuhi samtang nagpaabut sa tabang medical, ug mga paduwa.

Mahitabo usab ang orientation sa BIDA Program, mga gimbuhaton sa pagpakunhod sa panginahanglan sa drugas, pagpanumpa alan sa suporta sa Bida, pagmugnag jingle sa pagbatok sa drugas ug pag-inambitay sa kasinati-an sa pagdili sa drugas sa trabaho-an, eskwelahan, komunidad ug sa panimalay. (rahc/PIA_7/Bohol)

PAGHIUSA BATOK SA DRUGAS. Subay sa BIDA program sa DILG, hugpungon ang tanan sa komunidad aron hiusahang batokan ang drugas u gang patigayun niini, sagun sa DILG. (PIAbohol)