7 ka People’s Organization sa Bohol

nakadawat og tabang panginabuhian

TAGBILARAN CITY, Bohol, April 18 (PIA)--Pito ka People’s Organizations (POs) sa lalawigan sa Bohol ang nakadawat og tabang panginabuhian niadtong Lunes, Abril 17, 2023.

Kini ubos sa Department of Labor and Employment (DOLE) Integrated Livelihood Program (DILP) o Kabuhayan Program.

Ang 7 ka POs mao ang Samilca Irrigators Association Inc. sa lungsod sa Dagohoy, Smile San Vicente Farmers Association sa lungsod sa Ubay, Bato Women's Association sa lungsod sa Buenavista, Camarin Farmers Association sa lungsod sa Danao, United Prohance Irrigators Association ug La Hacienda-Katipunan Farmers Association, Inc. sa lungsod sa Pilar, ug ang Alburquerque Tricycle Drivers Association sa lungsod sa Albur.

Nakadawat ang maong mga POs og mga tseke alang sa tagsa-tagsa nga mga proyekto, livelihood starter kits, pang-abang og mga serbisyo sa mga gamit sa uma, produksyon sa itlog, free range nga produksyon ug pagpamaligya sa manok, hiniusang panginabuhian, ug vulcanizing, car washing, ug motorcycle spare parts retailing.

Gipangunahan nila Gob. Erico Aristotle Aumentado, DOLE–Bohol Provincial Director Maria Eloida Cantona, ug Edgar Del Rosario nga nagrepresentar ni Second District Cong. Vanessa Aumentado ang pag-turnover sa livelihood assistance sa pito ka POs didto sa Ceremonial Hall sa New Bohol Provincial Capitol niadtong Lunes.

Ang DILP o Kabuhayan Program mao ang kontribusyon sa DOLE sa agenda sa gobyerno sa inclusive growth pinaagi sa kaylap nga pagmugna og trabaho ug dakong pagkunhod sa kakabos.

Gitinguha niini nga makunhoran ang pagkahuyang sa mga peligro sa mga kabus, huyang ug nahimulag nga mga mamumuo pinaagi sa paghatag kanila og akses sa usa ka grant nga tabang alang sa pagpauswag sa kapasidad sa mga negosyo sa panginabuhi alang sa indibidwal o grupo nga mga bulohaton. (ecb/PIA7-Bohol)

Gipangunahan nila Gob. Erico Aristotle Aumentado, DOLE–Bohol Provincial Director Maria Eloida Cantona, ug Edgar Del Rosario nga nagrepresentar ni Second District Cong. Vanessa Aumentado ang pag-turnover sa livelihood assistance sa pito ka POs didto sa Ceremonial Hall sa New Bohol Provincial Capitol niadtong Lunes, Abril 17, 2023. (photo by PiMO)