Bol-anon’g runners mihipos sa

4 sa 6 ka pwesto sa Alicia Ultra

TAGBILARAN CITY, Bohol, April 18, (PIA) –Giharos sa mga Bol-anong mangdaganay, ang upat sa unom ka sa kategorya sa lumba sa labing bag-ong gitapos nga Alicia Ultra.

Ang Alicia Ultra, maoy tanyag sa lungsod sa Alicia uban ni Mayor Cesyl Balahay, human sa tulo naka tuig nga pag-undang sa ilang mga lumba sa dagan sa trails sa The Alicia Panoramic Park (TAPP) tungod sa pandemya.

Ang TAPP nga maoy sentro ug labing kulbahinam nga duwaanan sa mgamahilig sa extreme sports, mao ysab ang labing makalilisang nga sagubangon sa usa ka entrante sa Alicia Ultra kay kaya niini nga hutdon ang imong kusog sa labing tag-as ug tuktok nga mga tungason, makapatay sa kuko nga tugbongon ug naga-alisngaw nga ka-init sa yuta sa mga patag nga bahin sa lumba-anan.

Apan, bisan pa man, gibulsa gihapon ni Candelario Andie Logronio, taga Inabanga ang numero unong pwesto sa 50 kilometros nga dagan sa trail alang sa mga lalaki.

Si Logronio kinsa ika lima lamang sa nag-una niadtong 21-kilometer trail sa 2028, mibalik aron pagluwas sa iyang dungog nga nakuratan sa dagway sa kabukiran nga mingsalto ngadto sa kapunawpunawan, nga maoy iyang daganan.

Gi-uli usab ni James Palma, taga Loon, ang kadaugan sa 25 kilometros nga trail run sa mga laki ug gisignit ni Leonides Sollegue Jr. Tagbilaran City and 12 kilometros nga kadaugan usab sa dagan alang sa mga lalaki.

Gidughit usab ni Roxanne Optina taga Trinidad ang unang pwesto sa 25 kilometros nga lumba alang sa mga babaye, samtang ikaduha si Jessie Ejoc, taga Catigbian, sa mga babaye sa 50 kilometros ug ikaduha usab si Anabella Avenido taga Talibon sa 12 kilometros nga dagan sa pangbabaye.

Ang duha ka nahibiling labing unang pwesto, gidaug nila ni Kathlee Kate Ligan taga Cebu, sa 50 kilometros nga lumba sa dagan sa mga babaye ug ni Hannah Marie Arain, Sugbuanong propesor sa Physical Education sa Cebu Institute of Technology.

Ang lumba sa Alica Ultra trail nga marathon gihimo niadtong Domingo gikan sa alas 3:30 sa kaadlawon ug ming-cut-off human sa 12 ka oras alangsa 50 kilometer trail run, 6 ka oras sa 15 kilometer trail run ug 4 ka oras sa 12 kilometer trail run.

Sa 142 ka runners ga narehistro sa 50 KM trail run, 48 lamang ang nakahuman, 4 ang wala mohuman samtang 57 ang wala na mangahas og sugod sa lumba.

Sa 25 kilometer trail run, may 180 ka nagparehistro, 59 lamang ang nahuman sa duwa, 50 ang wala na makaabut sa cut-off time ug laing 71 ang wala na mangahas pag pakita sa starting line.

Sa 12 kilometer trail run, sa 144 nga mingrehistro, 56 lamang ang mingtapos sa wala pa ang cut-off time, 23 ang na-abtan sa cut-off ug 65 ang wala na magpatugatuga og sugod sa duwa. (PIA-7/Bohol)