4 ka Boholano Centenarians nakadawat og

100K cash incentives gikan sa OPSWD

TAGBILARAN CITY, Bohol, June 9 (PIA)--Upat ka Boholano centenarians ang nakadawat og P100,000.00 cash gifts ug plaques of appreciation gikan sa Provincial Government of Bohol (PGBh) pinaagi sa Office of the Provincial Social Welfare and Development (OPSWD).

Personal nga gipang-apod-apod ni Gobernador Erico Aristotle Aumentado ang tulo ka mga nakadawat, inubanan nila ni OPWSD Head Carmelita Tecson ug Program Officer for Senior Citizens Zerlina Salang Malanog-Vasquez, niadtong Hunyo 6, 2023, ngadto sa mga centenarians nga sila si Victoria Gulles sa lungsod sa Guindulman, Apolinaria Llido sa lungsod sa Jagna samtang sila si Josefina Tuyor ug si Zosima Torillo sa lungsod sa Mabini.

Ang OPSWD nitunol usab og Letter of Felicitation ngadto sa mga centenarians gikan sa Sangguniang Panlalawigan sa Bohol aron pahalipayan sila sa ilang pagkadawat sa mga insentibo ug pag-abot sa 100 anyos.

Pinaagi sa Provincial Ordinance No. 2022-003, nga nag-amendar sa 2020-020, nga giila nga Bohol Centenarian Ordinance, ang mga Boholano nga nagpanuigon og 100 anyos pataas pasidunggan og cash benefits gikan sa PGBh isip kabahin sa Strategic Change and Development Agenda on Health and Social Services.

Ang Centenarians Committee maoy modeterminar kon kinsa ang angayan nga makadawat sa cash incentives alang sa mga Boholano nga centenarians.

Ang kagamhanang probinsyal manghatag og cash incentive nga P100,000 dugang sa cash gift nga gihatag sa nasudnong kagamhanan. (ecb/PIA7-Bohol)

Alang sa ika-100 nga kasaulogan sa iyang adlawng natawhan, personal nga nadawat ni Apolinaria A. Llido sa Barangay Tejero, lungsod sa Jagna ang P100,000.00 cash gift gikan ni Gobernador Erico Aristotle Aumentado niadtong Hunyo 6, 2023. Ang Office of the Provincial Social Welfare and Development (OPSWD) nitunol usab og Letter of Felicitation gikan sa Sangguniang Panlalawigan sa Bohol aron pahalipayan si Llido sa iyang pagkadawat sa mga insentibo ug pag-abot sa 100 anyos. (photo from Erico Aris Aumentado FB)