Mingdaghan na ang Bol-anong

Nanarbaho, segun pa sa PSA

TAGBILARAN CITY, Bohol, June 7, (PIA) – Mitaas na ang labor force participation sa mga Bol-anon, segun sa natala sa tulo ka tuig nga milabay, kini segun sa Labor Force Survey nga gidumala sa Philippine Statistics Authority (PSA), dili pa dugay.

Hinay na usab nga ming-uli ang percentage sa employment rate dinhi kon itandi sa 2019 ngadto na sa 2021, kanus-a gipahigayun ang katapusang Labor Force Survey.

Gikan sa 62.3% niadtong 2019, apektado ang Labor Force participation sa pandemic ug anaa na lamang sa 59.4% ang labor force participation sa 2020.

Kini hinuon, ming saka na usab human mamalik ang mga regular nga trabaho, human sa pandemya ug milabaw pa sa 2019 dihang natala sa Bohol ang 65.5% labor force participation.

Gani, makit-an usab ang kausaban sa Employment Rate sa Bohol sa milabay nga tulo ka mga tuig.

Niadtong pagpagawas sa taho sa PSA niadtong 2019, miabut sa 93.7% ang employment rate sa Bohol base sa survey niadtong 2018, nga mingkanaug ngadto sa 91.3 sa panahon sa pandemya sa 2020.

Sa 2021 hinuon, ang employment rate sa Bohol mingsaka na usab sa 93.5, nga tataw nga nagpakita sa pagpamalik sa pagpangita sa kapanginabuhi-an sa mga katawhan nga nakalingkawas sa pandemya.

Sa unemployment rate, matud sa PSA nga sa 2019, 6.3 sa kinatibuk-ang populasyon sa labor force, walay trabaho.

Kini mas migrabe pa sa 2020 sa paglantong sa pandemya nga ming-abut na sa 8.7% sa labor force.

Apan sa 2021, mingbalik na usab ngadto sa 6.5% ang wala kakita pag kapanarbaho-an nga haum sa ilang kakayahan.

Gani, sa labing bag-o nga Bohol Poll nga gihimo sa survey teams sa Holy Name University, natala sa 2023 ang unemployment rate sa Bohol sa 8%, o walo sa matag 100 ka trabahante nga pwede na nga sweldohan aron motrabaho.

Segun sa Bohol Poll, niadtong 2017, ang unemployment rate sa Bohol anaa sa 10%. Kini mingkubos ngadto sa 8% sa 2018, ug 7% sa 2019.

Sa 2022, 9% na lang ang unemployment samtang sa Abril ngadto sa Mayo 2023, matud sa Bohol Poll, nahibalik sa 8% ang unemployment rate.

Sa hisgutanan sa under-employment, o kadtong nakatrabaho nga dili haum sa ilang kapasidad, o dili sakto sa oras nga gikinahanglan nga trabaho-an, sa 2019, 34.8% sa mga trabahante ang mingpugos na lamang sa pagpanarbaho bisan sa mas taas nga kakayahan.

Pagka 2020, gipagrabe pa sa pandemya ang underemployment nga mingtala na sa 32.3%, apan sa 2021, samtang nangabli na pag-usab ang mga trabahoan ug industriya, sanag ang dagway sa underemployment status nga mingkubos na ngadto sa 16.6%, segun pa sa PSA.

Sa laing bahin, sa HNU Bohol Poll, nakit-an usab nga ang lebel sa pagkatagbaw ug sa pagka diskumpyado sa trabaho.

60% sa mga trabahante sa Bohol ang natagbaw sa ilang mga trabaho, ug 27% niini, wala pa gihapon matigayun sa pagtuo nga wala magtimbang ang ilang trabaho sa ilang gihuptang katakus. (RAHC/PIA_7/Bohol)

MAS NABIBO HUMAN SA PANDEMYA. Nagkatapok pagbalik ang mga representante sa mga mamumuo nga nakasagubang sa pandemya samtang giplanohan ang sunod nga mga lakanga ron mapun-an ang mga kaayohan sa mga mamumuo didto sa tigum nga gipatawag sa DOLE. (PIABohol)