Tagbilaran ‘Mobile Health Clinic’

Mosuhot ngadto’s kabaranggayan

TAGBILARAN CITY, Bohol, June 5, (PIA) – Kung ang katawhan maglisud na gyud og adto pa sa Tagbilaran City Health Office ug sa mga nagkatag niini nga rural health units, ang City Government nagpasubo sa iyang Mobile Health Clinics alang niining katuyuan.

Matud ni City Mayor Jane Yap, nabati nila ang mulo sa katawhan, ilabi na kadtong mga anaa na sa nagsawop nga pangedaron nga maglisud na intawon og adto sa mga clinics ug City Health Office alang sa ilang regular nga check-up aron makakuhag resita sa mga tambal nga pang-maintenance ug pangontra sa sakit sa lawas.

Gisubhan niadtong miaging semana ang City Mobile Health Clinic nga usa sa labing bag-o nga serbisyo sa City Health Office uban ni Dr. Jeia Pondoc as administrasyon ni Mayor Jane Yap, ang mobile clinic nga pwede na nga maoy mosulod sa mga kabaranggayan niining syudad aron magdala sa serbisyong medical.

Gawas sa medical staff complement nga kaya makahimo sa konsultasyon sa bahan sa City Health Office, dala usab sa nahisgutang Mobile Health Clinic ang servisyo nga Electro Gardio Gram (ECG), Laboratory, Ultrasound ug X-ray., pasabut ni Mayor Yap.

Ang nahisgutang Mobile Clinic, nag-unang serbisyo ni Senador Risa Hontiveros ug gisuportahan ni Mayor Yap, Bise Mayor Adam Jala ug sa mga tinugyanan sa syudad nga makabenepisyo sa maong serbisyo.

Daghang mga senior citizens nga dili na kaya nga mopila pa sa mga clinics ug mobayad sa consultation fee, samtang anaa man kini nga serbisyo sa syudad, saysay sa mayor.

Hinuon, sa City Health Office diin may libre nga mga serbisyo, kasagaran ang mga senior citizens dili na makakaya pa nga maghuwat kanus-a maserbisyohan sa ka daghan usab sa mokuha niining mga serbisyo.

Dala niini, nalipay ang syudad nga ipadala na sa mga kabaranggayan ang ilang libreng serbisyo.

Niini, gikinahanglan lamang nga maschedule sa barangay ang pagbisita sa Mobile Health Clinic ngadto sa barangay aron usab maandam na ang mga buot mosinati sa serbisyo niini, panapos sa mayor.

Dili pa lamang dugay usab nga gisugdan sa syudad ang pagbalhin na ngadto sa digital ang sistema sa pagrehistro sa mga binuhi nga hayopan dinhi.

Pinaagi sa libre nga paglubong sa microchip sa lawas sa iro nga binuhi, mas sayon na sa syudad ang pag-ila sa mga layaw nga iro, o sayon nan nga ibalik sa tag-iya ang iro nga nakabuhi ug madakpan sa dog catching teams sa syudad.

Kini usab makapasayon na sa pag-ila sa tag-iya sa iro nga maoy makaingon sa disgrasya sa kadalanan, aron makapugos na usab ang mga tinugyanan ug ang mga biktima sa pagpangayog tabang sa pagpatambal. (PIA-7/Bohol)

LAAYAN NGA MAGHUWAT MASILBIHAN. Sa ka daghan sa tawo nga buot makakuhag serbisyo sa City Health Office, napun-an nag kapasidad ang buhatan nga permi maghuot sa mga residente nga nanginahanglag serbisyo medical. Ang City Mobile Health Clinic mahimo na nga mobista sa mga kabaranggayan aron moalagad sa Xray, ECG, laboratory ug ultrasound nga libre. (PIAbohol)

OK KAAYO. Human massi ni Mayor Jane Yap ang City Mobile Health Clinic, iyang gikasulti ang mga sakop sa media nga interesado usab kon giunsa sa mayor sa pagpakita sa ilang “Asenso pa more” nga slogan. (PIAbohol)