Bag-ong hugpong sa mga 

opisyal sa RADIO 7 nanumpa

TAGBILARAN CITY, Bohol (PIA)--Ang bag-ong hugpong sa mga opisyal alang sa 2024-2025 Regional Association of Development Information Officers in Region 7 (RADIO 7) nanumpa niadtong Setyembre 5, 2024, sa Negros Oriental Convention Center sa syudad sa Dumaguete, lalawigan sa Negros Oriental.

Si Negros Oriental Gob. Manuel "Chaco" Sagarbarria maoy nagdumala sa oath-taking ceremony tungod kay ang Negros Oriental mao ang host sa ika-26 nga RADIO-7 Convention karong tuiga.

Ang RADIO 7 mao ang payong nga organisasyon sa 5 ka asosasyon sa public information officer sa Central Visayas nga naglangkob sa Association of Negros Oriental Public Information Officers (ANOPIO), Cebu Association of City and Municipal Public Information Officers (CAOCAMPIO), Association of United Development Information Officers in Bohol (AUDIO-Bohol), Siquijor Association of Information Disseminators (SAID), ug Association of Government Information Officers in Region 7 (AGIO-7).

Ang mga bag-ong opisyal sa RADIO 7 mao sila si: Doris Isabel Racho, DM sa AUDIO-Bohol isip Presidente; Alvin Duazo (CAOCAMPIO) Bise Presidente; Zarline Sambas (AUDIO-Bohol) Secretary; Margaux Dela Paz (AGIO-7) Treasurer; Imee Taer Tapon (AUDIO-Bohol) Auditor; ug Mary Ann Dimabayao (AGIO-7) Press Relations Officer.

Samtang napili isip RADIO 7 Board of Directors sila si Risty Villahermosa (ANOPIO); Rizalyn Postrado (SAID); Jesus Rey Cavalida (CAOCAMPIO), Lito Bontigao (CAOCAMPIO), Karla Antonio (ANOPIO), Ryan Christopher Sorote (ANOPIO), Michelle Rosales (AGIO), Elizabeth Tabanao (SAID), ug Justin Daniel Lucero (SAID).

Si Racho, ang information officer sa Agricultural Training Institute (ATI) Central Visayas ug kasamtangang presidente sa AUDIO-Bohol nagkanayon nga dako ang iyang dungog ug pagpaubos sa pagsalig nga napili isip bag-ong presidente sa RADIO 7.

“I stand before you today with a profound sense of responsibility and determination to serve each and every one of you with integrity, compassion, and dedication (Nagbarug ko sa inyong atubangan karon nga adunay dakong pagbati sa responsibilidad ug determinasyon sa pagserbisyo sa matag usa kaninyo uban ang integridad, kalooy, ug dedikasyon),” matud pa ni Racho sa iyang acceptance speech.

“As we move forward, let us remember that our strength lies in our unity, our diversity, and our unwavering commitment. Together, we can overcome any obstacle and achieve greatness. So let us join hands, let us work together, and let us write the next chapter of RADIO 7 (Sa atong pagpadayon, atong hinumduman nga ang atong kalig-on anaa sa atong panaghiusa, sa atong pagkalain-lain, ug sa atong dili matarug nga pasalig. Busa maghiusa kita, magtinabangay kita, ug atong isulat ang sunod nga kapitulo sa RADIO 7),” dugang pa niya.

Ang mga public information officers ug tourism officers gikan sa lain-laing mga local government units sa Central Visayas nagtapok sa Negros Oriental niadtong Setyembre 4-6, 2024 alang sa tulo ka adlaw nga regional conference sa mga government communicators nga nagpasiugda sa agenda sa kalinaw sa gobyerno ug malungtarong paningkamot sa turismo sa rehiyon.

Ang mga asosasyon sa impormasyon sa gobyerno nga gi-organisa sa Philippine Information Agency (PIA) sa mga probinsya magpuli-puli sa pag-host sa tinuig nga regional convention.

Ang AUDIO-Bohol mao na usab ang host sa ika-27 nga RADIO 7 convention. (ECB/PIA7-Bohol)

Ang simbolikong pagbalhin sa gahom tali sa (L-R) outgoing RADIO 7 president, Risty Villahermoso gikan sa ANOPIO ug bag-ong napiling presidente nga si Doris Isabel Racho, DM gikan sa AUDIO-Bohol, uban ni Negros Oriental Gob. Manuel Sagarbarria nga maoy mihimo sa oath-taking atol sa ikaduhang adlaw sa ika-26 nga RADIO 7 Convention nga gipahigayon sa Negros Oriental Convention Center sa syudad sa Dumaguete niadtong Setyembre 5, 2024. (ECB/PIA7-Bohol)