‘Farming Support Program’

Gipalig-on ang tinabangay

TAGBILARAN CITY, Bohol, Sept 11 (PIA)—Kay nakit-an nga mamahimo’ng mayo nga tinubdan sa mas barato nga bugas humay kon mapamaayo pa ang Sistema niini, gihi-usa sa usa ka convergence meeting sa National Irrigation Administration (NIA) Region 7 ang maga ahensya nga may kalambigitan sa programang Farming Support (FSP).

Niadtong Lunes, Septembre, didto sa NIA R7 CVTC sa Dao, natigum ang mga kadagkoan sa Department of Agriculture (DA) RFO7, Philippine Center for Postharvest Development and Mechanization (PhilMech), National Food Authority (NFA) Region 7, ubay usab sa mga tinugyanan sa Office of the Provincial Agriculturist (OPA) ug pipila ka mga opisyales sa mga Irrigators Associations (IA) nga natabangan sa NIA sa lukop Rehiyon 7.

Kini aron palig-onon pa ang suporta sa mga nasampit nga ahensya sa contract farming nga maoy saligan sa FSP.

Didto sa tigum gihipno sa matag usa ka ahensay ang ialng tagsatagsa ka mga gimbuhaton agi og pagsuporta ilabi na sa human sa pagpangani, ug sa pagpagaling ngadto na sa pagtigum niini aron ikapamaligya sa goberno sa mas barato nga presyo.

Lakip sa mga nahisgutan ditto ang mga giya sa pagpatuman sa programa, pagbaylo-ay mga taho sa kahimtang sa mga unahan, imbentaryo sa mga ekipo nga magamit alang sa pagproseso sa tipasi ngadto na sa bugas, ug ang pagpagawas sa mga saad sa tabang gikan sa mga nahisgutang ahensya nga mingtambong sa tigum.

Didto usab gipalubad sa OPA ang tanyag niini sa paghatag og technical assistance ug pagpabansay sa mga tawo aron mailhan na nila ang kalidad sa bugas ug ang pagsukod sa moisture content, nga magpataas sa pagtipig sa bugas.

Gipadayag usab sa OPA nga mahimong sawhan sa tanan ang paggamit sa soil testing equipment sa Bohol nga anaa sa BISU Bilar.

Sa laing bahin, ang PhilMech Region 7 mipakita sa kompleto nga ekipo nga magamit isip post-harvest machinery nga magamit sa mga mag-uuma sa mga lugar nga mipailawom sa contract farming.

Matud ni NIA Region 7 Regional Manager, Engr. Rory F. Avance, ang convergene meeting usa ka importante nga lakang sa pagtapok sa mga kahinguhaan, pagtumbok sa unsa pa nga mga matang sa tabang ang magamit aron mas papalapad pa ang tabang sa kagamhanan ngadto sa mga mag-uuma.

Ang convergence meeting pabahin sa paningkamot sa NIA nga ugmaron pa ang Contract Farming Program, nga naghatag sa mga mag-uuma sa pili nga mga binhi, abono, pamatay-dangan, ug tabang pinansyalaron makasuporta sa mga mag-uuma nga makalabang sa kalisud ilabi na sa panalapi, ug maghatag sa kasaligan nga supply sa mas barato nga bugas. (PIABohol/NIA-7)

PAGPAMAAYO PA SA TINABANGAY. Gihiusa sa kagamhanan ang tanang ahensya nga may ikatabang pa sa pagpahipno sa usa ka kasaligang tinubdan sa baratong bugas. Ang Farming Support Program sa kagamhanan nga gitanyag sa NIA, makapamaligya sa mas baratong bugas nga ang pagpatubo, gigastohan sa goberno. (PIABohol/NIA-7)