BFAR nagbansay sa nanagat

Paghimo og fish pen, cage

TAGBILARAN CITY, Bohol, Sept 11 (PIA)—Gi-ingon na, hatagi ang tawo og isda, mapakaon mo siya sa usa ka adlaw. Apan tun-i siya og pangisda, ug may makaon siya sa tibuok kinabuhi.

Kini karon ang gihimo sa Bureau of Fisheries and Aquatic Resources (BFAR) Region 7, pinaagi sa Provincial Fisheries Office (PFO) Bohol, aron magamhan ang mga komunidad sa Bohol sa literal nga pagpaningkamot subay sa tanyag nila nga kapanginabuhian alang sa isla nga barangay sa Talibon ug sa Nahawan sa Clarin.

GIkan sa Agosto 19 ngadto sa 21, usa ka dupot nga bansaybansay ug aktwal nga pagtrabaho ang gipahigayun sa BFAR 7 ngadto sa mga tmangingisda sa Purok 5 Fishermen Association.

Kini diha nga gigiyahan sa BFAR ang mga katawhan sa pagtukod og Bangus Fish Pen, nga gi-ugsok sa yuta ang mga haligi.

Matud pa sa BFAR, ang proyekto nga nagkantidad og P249,500, naglangkob sa kompleto nga Bangus Fish Pen unit, mga gikinahanglan nga lawog sa isda ug 4,500 ka Bangus fingerlings.

Nagtuo nag BFAR nga pinaagi niini, mas mapadaghan ang abut nga isda, ug makunhoran ang kabug-at nga gipas-an sa dagat sa ka daghan na nga nanagat.

Sa laing bahin, didto sa Barangay Nahawan, sa Clarin, Bohol, gikan sa Agusto 27 ngadto sa 29, lain na usab nga bansay ang gipahigayon sa ahensya alang sa United Nahawan Fishermen Association.

Kini, alang na usab sa pagtukod og Bangus Floating Fish Cage, nga palutaw.

Ang nasampit nga kahugpungan, nakadawat og P242,500 alang sa nahisgutan nga proyekto nga naglangkob sa entire set sa fishcage, pokot, nylon, lawog ug nga 5,000 ka bangus fingerlings.

Kining mga proyekto, nagpadayag lamang sa kasibut sa BFAR nga hatagan sa kapasidad ang mga komunidad pinaagi sa pagpakat-on kanila sa mga katakus nga manikaysikay alang sa ilang tagsatagsa ka kinabuhi, pagpalugway pa sa panagatan ug pag-ugmad sa aquaculture. (PIABohol)

DILI NA MAGPALAGDAS. Sa ka daghan na sa managat ug kanihit sa isda, usahay mouli ang nanagat nga bugsay na lang ang bitbit, apan kon magsugod sa pamuhi og isda, bisan unsa nga orasa buot mokaon, aduna nay madala. Kini ang gitanyag nga kaalam sa BFAR ngadto sa mga mananagat sa Calrin ug Talibon. (PIABohol/BFAR)