Bohol Dengue Surveillance System gilusad

TAGBILARAN CITY, Bohol (PIA)--Gilusad sa Provincial Anti-Dengue Task Force (PADTF) sa Bohol ang Bohol Dengue Surveillance System ning bag-o lang.

Kini makita na pinaagi sa pag-akses sa dss.bohol.gov.ph.

Kini nga online dashboard nga gidesinyo sa Bohol Information Communication and Technology Office, nagsubay ug nag-update sa real-time sa aktibong mga kaso sa dengue, mga naayo, namatay, ug ang gidaghanon sa mga pasyente sa balay nga walay medikal nga tambag sa tanang lungsod sa Bohol.

Usa kini ka estratehikong inisyatiba aron masumpo ang nagkadako nga epidemya.

Kini nga teknolohiya maghatag og gahum sa PADTF, Provincial Health Office (PHO), ug mga local government units sa pag-ila sa mga lugar nga nanginahanglan og dinaliang community-based nga mga paningkamot sa pagpugong sa dengue, sama sa pagmentinar sa kalimpyo sa mga potensyal nga breeding sites.

Ang monitoring system kabahin sa inisyatiba sa Kagamhanan sa Probinsiya sa Bohol sa pagsagop sa mga innovative practices pinaagi sa pag-asdang sa information and communication technology (ICT), sumala sa gipasiugda sa Strategic Change Agenda ni Gob. Erico Aristotle Aumentado.

Kahinumdoman nga ang lalawigan sa Bohol gideklarar niadtong Setyembre 3, 2024, og province-wide dengue outbreak pinaagi sa Sangguniang Panlalawigan Resolution No. 2024-811.

Kini tungod sa pagsaka sa mga kaso sa sakit nga dala sa lamok human ang mga kaso nisaka ngadto sa kapin sa 450 porsyento sukad niadtong Enero.

Base sa datos sa PHO, ang mga kaso sa dengue gikan Enero 1 hangtod Agosto 24 niabot sa 5,839, nga mas taas og 451.4 porsiyento kon itandi sa 971 ka kaso nga natala sa samang panahon sa miaging tuig. (ecb/PIA7-Bohol)

Ang Bohol Dengue Surveillance System nga makita pinaagi sa pag-akses sa dss.bohol.gov.ph. (ecb/PIA7-Bohol)