DOLE nipasidaan sa mga nangita og

trabaho batok sa online job scams

TAGBILARAN CITY, Bohol (PIA)--Gipahimangnoan sa Department of Labor and Employment (DOLE) ang mga nangita og trabaho ug ang publiko nga magmatngon sa online job scams.

Sa usa ka advisory, gi-awhag sa DOLE ang publiko nga i-report sa ilang opisina o sa tukma nga awtoridad, ang bisan unsang kadudahang kalihokan sa illegal recruitment ug human trafficking, bisan kung gihimo sa pisikal o pinaagi sa social media ug uban pang mga online platform.

Ang advisory subay sa paningkamot sa departamento nga hingosgan ang kampanya batok sa illegal recruitment.

Sa samang paagi, ang DOLE nagpahinumdum sa publiko nga ang bisan unsang recruitment activities nga himuon sa dili lisensyado o wala naghupot o awtoridad maisip nga ilegal ug masilutan og multa o pagkabilanggo, o pareho sa desisyon sa korte, ubos sa Artikulo 38 sa Labor Code of the Philippines, nga gi-amendahan ug nahimong Republic Act No. 10022.

Alang sa dugang updates, gi-awhag ang mga nangita og trabaho ug ang publiko sa pagbisita sa DOLE website sa https://www.dole.gov.ph/ o Facebook page sa https://www.facebook.com/laborandemploymentph ug sa PhilJobNet sa www.philjobnet.gov.ph alang sa local job posting.

Sa laing bahin, alang sa overseas job postings, ang mga nangita og trabaho mahimong mobisita sa website sa Philippine Overseas Employment Administration sa www.poea.gov.ph. (ecb/PIA7-Bohol)

Gi-awhag sa DOLE ang publiko nga i-report sa ahensya o sa hingtungdan nga awtoridad ang bisan unsang mga kadudahang kalihokan nga adunay kalabotan sa illegal recruitment ug human trafficking, pisikal man o sa social media ug uban pang mga online platform. (ecb/PIA7-Bohol)