Kampanya batok sa online sex abuse

sa mga bata gipangunahan ni PBBM

MANILA (PIA)--Gipangunahan ni Presidente Ferdinand Marcos Jr. ang kampanya batok sa pagkaylap sa Online Sexual Abuse and Exploitation of Children (OSAEC) sa nasud.

Sa iyang pakigpulong sa gipahigayon nga OSAEC Summit 2024, gipasiugda ni Presidente Marcos nga halos tunga sa milyon ka mga bata sa Pilipinas ang nahimong biktima sa online sexual abuse ug exploitation.

Matud pa sa presidente, makauuwaw tungod kay walay igong gihimo ang gobyerno sa pagsumpo sa maong matang sa krimen ug padayon nga nag-uswag ang mga nalambigit niini.

Aron hingpit nga mapapas kini, gimugna sa presidente ang Presidential Office for Child Protection (POCP) nga maoy magsilbi nga sentro sa tanang estratehiya ug kahinguhaan aron maseguro nga matag bata sa nasud mapanalipdan ug masuportahan.

Gitumbok usab sa presidente ang kahimtang sa Tier 1 sa Pilipinas sa Trafficking in Persons Report, nga nagpakita sa liderato sa nasud sa pagsukol sa human trafficking ug mga krimen sa OSAEC.

Apan giangkon usab ni Marcos nga daghan pa ang kinahanglan nga buhaton, ingon nga ang kapin sa 1,000 nga mga biktima nga naluwas ug kapin sa 100 nga mga suspetsado nga naaresto gikan sa 2022 hangtod Hulyo 2024 nagrepresentar lamang sa usa ka minorya sa mga aktwal nga kaso.

Ang Presidente nanawagan sa nagkalain-laing ahensya sa gobyerno, local government units, komunidad, ug international partners nga magpabiling lig-on sa pakigbatok sa OSAEC.

Dugang pa, gimanduan usab ni Presidente Marcos ang mga hingtungdang ahensya nga pagpalig-on ang sistema sa hustisya sa kriminal aron masiguro nga ang tanan nga mga sad-an madala sa hustisya. (ECB/PIA7-Bohol)

Dugang ug gipalambo nga aksyon sa pagtapos sa Online Sexual Abuse or Exploitation of Children (OSAEC) ang panawagan ni Presidente Ferdinand R. Marcos Jr. sa “Iisang Nasyon, Iisang Aksyon” Summit sa syudad sa Makati niadtong ika-16 sa Setyembre 2024. (PCO/PIA)