Mga pribadong mamumuo sa CV

makakuha og usbaw sa suholan

TAGBILARAN CITY, Bohol (PIA)--Gi-aprobahan na sa Central Visayas Regional Tripartite Wages and Productivity Board (RTWPB) ang usbaw sa inadlaw nga minimum wage rates sa mga trabahante sa mga pribadong establisemento sa rehiyon.

Sa usa ka pahayag, ang Department of Labor and Employment (DOLE) nagkanayon nga ang RTWPB nagtakda sa usbaw sa inadlaw nga minimum nga suholan gikan sa P33 ngadto sa P43 matag adlaw, sugod Oktubre 2.

Ang usbaw nagdala sa inadlaw nga minimum nga suholan gikan sa P458-P468 ngadto sa P501 alang sa mga trabahante sa pribadong establisemento ubos sa Class A o ang mga dakbayan sa Carcar, Cebu, Danao, Lapu-Lapu, Mandaue, Naga ug Talisay ug mga lungsod sa Compostela, Consolacion, Cordova, Liloan, Minglanilla ug San Fernando, ug gikan sa P425-P430 ngadto sa P463 sa ubang mga syudad nga wa ma-classify ubos sa Class A, nga naglakip sa Bais, Bayawan, Bogo, Canlaon, Dumaguete, Guihulngan, Tagbilaran, Tanjay ug Toledo.

Alang sa Class C o mga lungsod nga wala nasakop sa Class A ug B, ang inadlaw nga minimum nga sweldo gi-usbawan ngadto sa P453 gikan sa P415-P420.

Ang wage order giluwatan nunot sa direktiba ni Presidente Ferdinand R. Marcos, Jr. niadtong Labor Day ngadto sa RTWPBs sa pagrepaso sa rehiyonal nga minimum wage rates sa dili pa ang anibersaryo sa miaging umento sa suholan.

Ang kataposang wage order sa mga trabahante sa pribadong establisemento sa Rehiyon VII nahimong epektibo niadtong Oktubre 1, 2023. (ECB/PIA7-Bohol)

Ang bag-ong umento sa suholan sa Rehiyon VII, mo-epekto sa 02 Oktubre 2024, ang adlaw human dayon sa petsa sa anibersaryo sa miaging regional wage order. (DOLE/PIA)