Mga mobile clinic alang sa mga

hilit nga dapit, gipadala ni PBBM

MANILA (PIA)--Gipangunahan ni Presidente Ferdinand R. Marcos Jr. ang pagpadala sa usa ka panon sa 28 ka mobile health clinics niadtong Biyernes, nga gitumong sa pagdala sa mga serbisyong medikal sa hilit nga mga lugar sa tibuuk Pilipinas.

Atol sa usa ka seremonyas sa North Harbor Port sa Manila, gipasiugda ni Marcos ang papel sa mga klinika sa pagsulbad sa mga kalainan sa pag-atiman sa panglawas.

Ang inisyatiba, kabahin sa kampanya sa “Bagong Pilipinas” sa gobyerno nga nagtumong sa geographically isolated and disadvantaged areas (GIDAs).

Ang matag klinika nasangkapan sa modernong medikal nga teknolohiya, lakip ang digital X-ray ug ultrasound machine.

Baynte otso ka mga probinsya, labi na sa Mindanao, ang makadawat sa mga mobile unit. Ang unang 14 ka mga klinika mibiya paingon sa Cagayan de Oro City sakay sa lantsa human sa seremonyas niadtong Setyembre 20.

Ang Department of Health (DOH) ang nanguna sa proyekto, nga nahiuyon sa 8-point agenda sa administrasyon alang sa pagpalambo sa sektor sa kahimsog sa nasud.

Si First Lady Liza Araneta-Marcos ug ang mga opisyal sa Gabinete miduyog sa Presidente sa maong kalihokan, diin siya mismo ang nag-apod-apod sa mga deed of donation ngadto sa mga representante gikan sa mga probinsiya nga nakadawat.

Ang programa sa mobile clinic nagtumong sa pagdugtong sa gintang sa pag-atiman sa panglawas sa hilit nga mga lugar, diin ang mga residente kanunay nga nag-atubang sa mahagiton nga mga pagbyahe ug taas nga gasto sa pag-akses sa medikal nga pag-atiman. (ecb/PIA7-Bohol)

Bagong Pilipinas mobile clinics. 28 ka mga probinsya, labi na sa Mindanao, ang makadawat niining mobile unit sa gobyerno nga gitumong alang sa mga geographically isolated and disadvantaged areas (GIDAs). Kining matag klinika nasangkapan sa modernong medikal nga teknolohiya, lakip ang digital X-ray ug ultrasound machine. (PCO/PIA)