PBBM sa mga ginikanan: Mga bata pabakunahan

MANILA (PIA)--Nanawagan si Presidente Ferdinand Marcos Jr sa mga ginikanan o guardian aron mabakunahan ang ilang gagmay o masuso nga mga anak.

Tumong niini nga mapanalipdan ang ilang mga anak batok sa mga sakit nga mapugngan sa bakuna sama sa pertussis, polio, ug tipdas.

Sa usa ka vlog, gipasiugda ni Presidente Marcos ang kamahinungdanon sa paghatag og barato ug dali nga serbisyo sa pag-atiman sa panglawas sa mga Pilipino, labi na ang mga bata.

Dugang pa sa Presidente nga ang Department of Health (DOH) naglunsad og vaccination drive, nga nagtumong sa pagbakuna sa mga bata sa ilang unang 12 ka bulan.

“Tulungan niyo kami…kasi minsan ‘yung iba ayaw magpabakuna dahil natatakot sila baka hindi maganda ang bakuna, baka mas lalong masaktan ang bata. Hindi po. Lahat itong binibigay naming bakuna, tested po ito at ilang taon na ginagamit ‘yan,” pagseguro pa sa Pangulo.

Sa laing bahin, tumong sa DOH nga hingpit nga mabakunahan ang 95% sa mga kabataang Pilipino batok sa mga sakit nga mapugngan sa bakuna.

Sa miaging tuig, nagpakita og kalamboan ang kampanya sa imyunisasyon sa gobyerno, diin ang Pilipinas nakagawas na sa listahan sa top 20 ka nasud nga adunay pinakadaghang "zero-dose" nga mga bata.

Tungod kay ang World Health Organization (WHO) naghubit sa "zero-dose" nga mga bata isip kadtong wala pa nabakunahan sa bisan unsang bakuna, kadtong "walay access o wala gayud maabot sa naandan nga mga serbisyo sa pagbakuna."

Samtang ang bata nga hingpit nga nabakunahan nakadawat og usa ka dosis sa bacille Calmette-Guérin (BCG) nga bakuna alang sa tuberculosis; tulo ka dosis sa oral polio vaccine (OPV); tulo ka dosis sa diphtheria, tetanus, pertussis, Hib, ug Hepatitis B (pentavalent) nga bakuna; ug duha ka dosis sa measles, mumps, ug rubella (MMR) vaccine.

Ang DOH gikatakdang molusad sa nationwide school vaccination program nga gitawag og "Bakuna-Eskwela" karong Oktubre 7, nga nagpalugway sa National Immunization Program (NIP). (ecb/PIA7-Bohol)

Ang DOH molusad sa “Big Catch Up” nga kampanya, nga magpasiugda sa tibuok nasod nga “Bakuna Eskwela” nga inisyatiba sugod sa Oktubre 7. Ang nag-unang tumong sa gobyerno niining kampanya mao nga masiguro nga 95% sa mga bata sa tibuok nasud mahimong fully immunized, isip parte sa paningkamot sa administrasyon nga atimanon ang kahimsog sa mga kabataan ug maprotektahan sila gikan sa mga sakit nga mahimong mapugngan pinaagi sa bakuna. (ECB/PIA7-Bohol)