Oras sa trabaho sa gobyerno sa Sept. 23 gipamub-an

alang sa ‘Kainang Pamilya Mahalaga Day’

TAGBILARAN CITY, Bohol (PIA)--Ang Malacañang niluwat og Memorandum Circular (MC) 64, nga nagpamubo sa oras sa trabaho sa mga opisina sa gobyerno sa Setyembre 23 subay sa pag-obserbar sa ika-32 nga National Family Week ug Kainang Pamilya Mahalaga Day.

Ubos sa MC 64 nga gilagdaan ni Executive Secretary Lucas Bersamin niadtong Setyembre 12, suspendido ang trabaho sa executive branch gikan sa alas 3 sa hapon sa maong adlaw.

Giila sa MC 64 ang panginahanglan sa mga trabahante sa gobyerno sa pagsaulog uban sa ilang pamilya sa National Family Week ug Kainang Pamilya Mahalaga Day.

Ang memorandum circular nag-awhag sa pagsuspenso sa trabaho sa tanang sanga sa gobyerno, independenteng komisyon o body, ug pribadong sektor aron mahatagan ang tanang pamilyang Pilipino sa hingpit nga kahigayonan sa pagsaulog sa ika-32 nga National Family Week.

Gawas niini, ang MC 64 nagmando sa mga ahensya sa gobyerno kansang mga gimbuhaton naglakip sa paghatod sa mga batakang serbisyo ug kahimsog, pagkaandam, pagtubag sa mga katalagman ug kalamidad, ug paghimo sa uban pang hinungdanon nga mga serbisyo sa pagpadayon sa ilang mga operasyon ug paghatag sa kinahanglan nga serbisyo.

Ang Proclamation 60 nga gi-isyu niadtong 1992 nagdeklarar sa kataposang semana sa Setyembre sa matag tuig isip Family Week. Sa laing bahin, ang Kainang Pamilya Mahalaga Day gihimo matag ika-upat nga Lunes sa Setyembre matag tuig, pinaagi sa Proclamation 326 nga gi-isyu niadtong 2012.

Gihandum sa nasud ang National Family Week aron pagpalig-on ug pagpalambo sa panaghiusa ug kalig-on sa Pamilyang Pilipino isip nag-unang unit sa katilingbang Pilipino.

Ang Kainang Pamilya Mahalaga Day gi-obserbar matag tuig aron ipasiugda ug i-selebrar ang bili sa mga pamilyang Pilipino nga nag-ambitay og mga pagkaon isip nasudnong tradisyon. (ECB/PIA7-Bohol)