PCO ug DOH gimanduan sa pagpalig-on

sa impormasyon kalabot sa pagbakuna

MANILA (PIA)--Gimanduan ni Presidente Ferdinand R. Marcos Jr. ang Presidential Communications Office (PCO) nga makig-alayon sa Department of Health (DOH) sa pagpalig-on sa immunization information campaign alang sa mga bata.

Atol sa usa ka sektoral nga meeting, gipasiugda ni Presidente Marcos ang kamahinungdanon sa epektibong komunikasyon, diin gimanduan si PCO Acting Secretary Cesar Chavez sa paggamit sa social media aron mapataas ang kahibalo kalabot sa bakuna.

Gipasiugda sa Pangulo ang panginahanglan sa paggamit sa social media.

Gitumbok usab niya ang papel sa media sa pagpakaylap sa mga anunsyo sa serbisyo publiko diin matud pa niini nga kinahanglan natong gamiton ang tanang magamit nga airtime.

Matud pa sa DOH, ang coverage sa fully immunized children (FIC) ubos sa target nga 95 porsyento sukad niadtong 2010, diin 34.7 porsyento ang fully immunized sukad niadtong Hulyo 2024.

Si DOH Kalihim Teodoro Herbosa nag-ingon nga ang pagkunhod sa immunization rates mahimong tungod sa mga pagkabalda tungod sa COVID-19 pandemic, nga nagpahunong sa mga programa sa pagbakuna nga nakabase sa mga eskwelahan.

Aron matubag kini, ang DOH molusad sa “Big Catch Up” nga kampanya, nga magpasiugda sa tibuok nasod nga “Bakuna Eskwela” nga inisyatiba sugod sa Oktubre 7.

Ubos sa maong kampanya, makadawat ang mga estudyante sa pampublikong tunghaan og bakuna alang sa measles, rubella, tetanus, diphtheria, ug human papillomavirus o HPV.

Ang nag-unang tumong sa gobyerno niining kampanya mao nga masiguro nga 95% sa mga bata sa tibuok nasud mahimong fully immunized, isip parte sa paningkamot sa administrasyon nga atimanon ang kahimsog sa mga kabataan ug maprotektahan sila gikan sa mga sakit nga mahimong mapugngan pinaagi sa bakuna. (ECB/PIA7-Bohol)

Atol sa sectoral meeting sa Palasyo niadtong Setyembre 17, gimanduan ni Presidente Ferdinand R. Marcos Jr. ang PCO ug DOH nga maghiusa sa pagpalig-on sa information drive kalabot sa pagbakuna sa mga bata. Sa maong meeting, gipasiugda usab sa Presidente ang importanteng papel sa social media ug pakigtambayayong sa mga respetadong medical practitioners aron makatap ang mas lapad nga impormasyon ngadto sa publiko. (PCO/PIA)