Sulbong sa presyo sa Hulyo

Mas mihinay kay sa Hunyo

TAGBILARAN CITY, Bohol Sept 10 (PIA)—Gikan sa 4.9 porsyento sa miaging buwan sa Hulyo, ang pagsaka sa presyo sa kasagarang nga mga paliton ni gibantayan sa Philippine Statistics Authority (PSA), namatikdan nga minghinay pa gayud ngadto na sa 2.1 porsyento.

Hinuon, gipasabut ni PSA Bohol Statistician Jessamyne Anne Alcazaren, nga ang pag-ubos sa dagan sa presyo, hangtud nga mamahimong negative ang porsyent, kini na ang talimad-on nga ming-ubos na ang presyo kay sa unang buwan nga gitandi-an.

Gipahinumdum usab niya nga sa susamang buwan sa mi-aging tuig, nasinati sa nasud ang halos pagdoble sa presyo sa bugas, ug gani naghimo na og price ceiling ang goberno aron mopundo ang presyo, ug karon halos mingkamang na ang pagtaas sa presyo sa susamang paliton sa katapusang tulo ka buwan.

Gitumbok sa PSA, segun sa ilang regular nga pagmonitor sa mga nag-unang paliton nga gikinahanglan sa us aka banay, nga ang paghinay sa sulbong sa presyo, na-angin sa tinuig nga average sa pagdagan sa presyo sa pagkaon ug mga ilimnon nga dili makahubog, panakyanan ug sa presyo sa pabalay, tubig, koryente, gas ug uban pang matang sa igtutubil.

Gawas pa, mingtampo usab ang ginagmay nga paghinay sa abante sa presyo sa sapot ug footwear, mga gamit sa balay, mga presyo sa kalingawan, paugnat sa kusog, edukasyon ug mga kan-anan ug temporaryong katulganan.

Mismo ang paghinay sa pagsulbong unta sa presyo sa pagkaon namatikdan nga gikan sa 8.5 porsyento, mingtibugsok ngadto sa 3.7 porsyento.

Kini, kay pahinumdom pa sa PSA, gikan sa 23.7 porsyento sa Hulyo niining tuiga, wala kayo mogara ang pagsaka sa presyo nga namatikdan nga naa lamang sa 11.2 porsyento.

Dugang pa, mas mingstabilize ang presyo sa isda, ug sa karne ug mga parte gikan niini gikan sa 4.9 porsyento sa miaging buwan ngadto na sa 2.7 porsyento.

Namatikdan usab sa PSA ang hinay nga kamang sa presyo sa oil, mga prutas, mga utanon, lagutmon, saging ug mga pagkaon nga niluto nang daan. (RAHC/PIABohol)

DAKU ANG EPEKTO SA BUGAS. Sanglit mas daku ang ipahat sa mga konsumidor alang sa pagpalit og pamugas, ang pagsulong u gang pagkamang sa presyo sa bugas, maoy magtudlo sa kinaiya sa kasagarang presyo sa mga paliton, tumbok ni PSA Bohol Jessamyne Anna Alcazaren didto sa binuwan nga Inflation press conference sa PSA. (PIABohol)