Wala’y na-dengue gitambagan

Magpa-ospital, ang nagmagahi

TAGBILARAN CITY, Bohol (PIA)—Bisan pa man nga puno-puno pa ang mga tambalanan sa mga nagpa-atiman sa dengue, walay bisag us aka pasyente nga mipili nga dili magpaconfine sukwahi sa tambag sa mga doctor.

Kini, segun sa kasayuran nga gipagawas sa Bohol Anti-Dengue Task Force sa ilang Bohol Dengue Surveillance System, hangtud sa alas 5:00 sa hapon sa Septembre 10.

Una na nga gipasabut ni Provincial Health Officer Dr. Cesar Tomas Lopez nga duna nay gipagawas nga abiso nga ang dengue, basta dili kayo ubos ang ihap sa platelets sa pasyente, mahimo nga adto na atimanon sa balay.

Gipasalig na usab ni Gobernador Erico Aristotle Aumentado nga mipalig na ang Probinsya og P3M nga bili sa rehydration solutions, aron ipang-apud-apud sa mga tambalanan nga iya sa lalawigan.

Gawas niini, nagpalit na usab og mga testing kits aron mas sayun ang pagkompirmar sa sakit.

Gipalihok na usab sa Kapitolyo ang 8,000 niini ka Barangay Health Workers aron maoy mosuhid ug modala sa mga gipanghilantan nagdto sa labing duol nga Rural Health Units, aron matan-aw sa doctor.

Ang mas sayo nga pagpatan-aw sa doctor, usa sa mga labing maayong bansay sa pagbuntog sa dengue, dayag ni Dr. Lopez.

Dul-an na sa 4,000 ang mga natakdan sa dengue fever nga karon nauli-an na, apan may 2,320 pa gihapon nga kasamtangan nga nasakit, human 14 na ka Bol-anon ang nametag sa labing bag-o nga gara sa sakit nga dala sa lamok.

Nagpabilin ang Tagbilaran City nga may labing daghan nga kaso: 241, ug gisundan sa Ubay nga may 138, unya ang Talibon nga may 126 ka kaso, Inabanga sa 110 ka kaso, Jagna sa 96 ka kaso ug ikaunom ang Getafe sa 96 ka kaso.

Sa laing bahin, sa mga kalungsuran nga may labing dyutay nga kaso: kini ang Loay nga may 4 ka kaso, Sand Isidro nga may 6 ka kaso, Sikatuna nga may 7 ka kaso ug ang mga kalungsuran sa Dimiao, Bilar ug Catigbian nga may tag 11 ka kaso. (RAHC/PIABohol)

ALL HANDS ON DECK. Gikan ni Provilncial Administrator Aster Caberte, ni Provincial Health Officer Dr Cesar Tomas Lopez, sa Department of Health Field Officer Dr. Van Phillip Baton ang nagpatapok sa mga kahinguhaan sa kagamhanan aron ipaseguro nga mahupay ang mga kahandlok sa mga Bol-anon sa kapasidad sa mga ospital niining panahon sa epidemya. (PIABohol)