Turista’ng natanggong sa

Balicasag, uli nas Panglao

TAGBILARAN CITY, Bohol, Sept 12 (PIA)—Upat ka dagkong bangka ug gi-escortan sa Philippine Coast Guard (PCG) ang gisakyan sa mga turista nga nangatanggong sa isla sa Balicasag gikan sa ilang pag-island hopping Septembre 12 sa buntag, aron lamang makapauli kini sa mainland Panglao.

Luwas nga nakadunggo na nga walay insendente ang mga turista nga gipugngan na usab sa PCG dihang mamauli na unta sa palis nianang adlawa, human masinati ang kalit nga pag-unos nga nakaingon sa pagkalunod sa usa ka bangka nga nag-island hopping ug ang pagsungag sa laing pang duha ka bangka nga giluwanan sa mga turista nga didto na duol sa isla sa Gak-ang, sa kadagatan sa Poblacion Panglao.

Gipugngan ang mga nasampit nga turista nga nakaabut na sa Balicasag alang ilang island hopping, diha nga may unos nga nagpadagko sa bawod ug nakapalunod sa pipila ka mga bangka didto.

Walay swerte ang usa ka boatman nga nakaabut na duol sa isla sa Gak-ang diha nga natagak gikan sa usa ka bangka, ug napalgan na nga patay human sa pipila ka minutos.

Segun sa mga taho sa mga rescuers sa PCG, diha nga natagak ang boatman, nitugsab na ang iyang tiil sa mabaw nga dagat mao nga misinyas na kini sa kapitan nga mopadayon na lamang sa pagdunggo sa duol na nga baybay, kay mosunod ra kini sa pag-ubog ngadto sa luwas nga kamad-an.

Apan, wala na makasunod pa ang natagak nga boatman.

Nabangawan na lamang sa mga rescue units sa PCG ang patay nga lawas nga diha pa gihapon duol sa iyang gikatagakan, apan may dako nga samad sa agtang, nga gidudahang iyang nakuha pagkapakog dihang natagak sa bangka.

Luwas ang lima ka mga Koreano nga turista nga luwan sa nasampit nga bangka, apil na ang kapitan niini.

Nalunod usab duol sa nasampit nga isla ang laing bangka nga giluwanan sa 2 pa ka Koryano, boatman ug kapitan niini.

Sa laing bahin, naluwas usab sa PCG nga misungasong sa unos ang duha pa ka bangka nga giluwanan sa tag napulo ka turista nga naabtan sa unos taliwa sa kadagatan sa Balicasag ug Isla sa Puntod, segun pa sa PCG.

May mga gikataho usab nga naluwas apan gidala sa ospital sa Tagbilaran aron maatiman ang pipila ka mga naangol ug nasamad.

Matud ni PCG Bohol Staion Commander Romulo Balonga, linaw pa ang dagat sa paggikan sa mga turista paingon sa Balicasag nanang buntag, mao nga gitugotan kin inga makalawig.

Sa pagka-udto, mikalit og unos, mao nga kadtong naabtan nga naa na sa lawod, kinahanglan na lamang nga modunggo sa mga isla aron makasugakod sa bawod, apan ang uban, walay swerte nga nalunod gyud. (PIABohol)

GUOL NGA PALANDUNGON. Naa na sa mabaw ug wala magtuo ang kapitan sa bangka nga mamatay pa ang iyang boatman nga natagak kay mingbarog pa sa taga dughan nga tubig sa dagat, apan human sa pila ka moinutos, napalgan na lamang nga patay na nga may samad ang agtang. PIABohol/PCG WesternBohol)