Temporaryo nga pagsuspenso

sa mga panagatan, gipatuman

TAGBILARAN CITY, Bohol, Sept 12 (PIA)—Temporaryo na nga gipugngan sa Philippine Coast Guard (PCG) ang pagbyahe sa mga gagmay nga sakyanan nga pangdagat, apil na ang mga bugsayan ug bangka nga de-motor nga ang timbang ubos pa sa 15 gross tons, sulod sa area of responsibility sa PCG Western Bohol sugod September 12 sa alas 11 sa kaudtuhon, hangtud kini malibkas.

Matud ni PCG Lieutenant Junior Grade Romulo Balonga Jr., Station Commander sa PCG Western Bohol, kini nga temporary nga pagsuspenso sa mga byahe sa mga panagatan ug uban pang gagmay nga mga sakayan, dala sa epekto sa Tropical Cyclone Advisory No. 4 alang sa kusog nga bagyo nga giila nga Bebinca, subay sa advisory nga giluwatan sa state weather bureau September 12 sa alas 11:00 sa kaudtohon.

Sa ilang pagbanabana, ang Philippine Atmospheric Geophysical Astronomical Services Administration (PAG-ASA) mipadayag nga sa sunod nga 24 oras, ang epekto sa bagyo magpagrabe nga habagat ug magdala og kasarangan ngadto sa baluron nga kadagatan.

Kini gibanabana nga mahitabo sa mga kadagatan sa kasubangan sa Mindanao, kasadpang kadagatan sa Palawan apil ang Kalayaan Islands, kasadpang kadagatan sa Visayas, kasubangan nga kadagatan sa Palawan, kasadpang kadagatan sa Mindanao ug sa habagatan ug kasubangan nga kadagatan sa Visayas, diin ang kadagatan sa Bohol nalakip.

Kadtong mga tigpadagat nga luwan sa gagmay nga sakayan, apin na ang tanang matang sa bangka nga de motor, gitambanag usab sa PCG nga dili una moplalawod samtang nagpabilin kining kondisyon, labi na gayud sa mga walay kasinati-an ug kadtong nagluwan sa mga sakyanan sa dagat nga walay ikasagubang sa hangin ug bawod.

Gipahimangnoan usab sa ahensya ang mga namakayay ug pasahero, mga katilingban nga anaa sa baybay, nga dili una mobyahe ug magpaduol sa dagat ug mga kalihukan sama sa pagpangaligo sa dagat aron mapugngan ang dili kalikayan nga mga hitabo.

Ang hukom sa PCG Western Bohol, ila usab nga gibase sa HPCG Memorandum Circular No. 03-01, o ang guidelines sa movement sa mga motorboats/ vessels in the absence of weather bulletin in the locality, ug ang HPCG-CG 8 Memorandum Circular No 02-13 o mas nailhan nga guidelines on the movement of vessels during heavy weather. (RAHC/PIABohol)