Bohol HRM practitioners, naghimog

medical, dental Mission sa Tubigon

TUBIGON, Bohol Sept 12 (PIA)—Serbisyo sibil, sa labing batakan nga dagway, kini maoy dala sa Bohol Association of Human Resource Management Practitioners Incorporated (BAHRMPI) ngadto sa mga residente sa mga isla sa Tubigon, nga sa pagka karon, apektado sa labing daghang hagit, ilabi na sa nagpungasi nga habagat.

Kapin sa 400 ka tawo, nga representante sa mga banay sa mga isla sa Ubay, Batasan, Mocaboc, Panggapasan ug Bagongbanua ang mga nakasinati sa serbisyo medical, dental ug relief operations sa BAHRMPI, nga didto nahitabo sa Tubigon Cultural Center.

Agi og paghandum sa Civil Service Month, ang Civil Service Commission Region-7, sa pagpakig-tambayayong sa Kapitolyo pinaagi ni Gobernador Erico Aristotle Aumentado ug sa iyang Medical Outreach Unit (MOU), sa local nga kagamhanan sa Tubigon ug sa mga local nga kagamhanan sa mga kalungsuran sa Bohol kang kinsa nga mga sakop sa BAHRMPI nagagikan, gihimo ang medical mission ug dental services nga may pakapin nga food ug grocery packs isip relief operations, saysay ni Rogelio Rosco, Human Resource and Management Officer IV sa Tubigon.

Sa nahisgutan nga medical mission nga gipahigayon, sobra sa 200 ka mga taga-isla ang nakakuha sa libre nga konsulta, ug ang mga resita, gitugbangan usab sa mga libre nga tambal, gikan sa MOU, sa RHUs nga nagpadala, ug sa mga mingsalmot nga units.

Dili pa kana igo, walay niuli nga walay bitbit nga pagkaon o suplay sa pagkaon, mga bitamina ug food supplements, dugang ni Rosco.

Kauban sa medical mission team ang walo ka doctor: duha nga iya sa Rural Health Unit Tubigon, ug unom nga gikan sa augmentation sa Capitol pinaagi sa Provincial Health Office ug sa MOU.

“Mi-anghi ako, alang sa medcial check-up, wala ko magdahum nga human sa libre nga check-up, may libre diay usab nga tambal human ilatunol ang resita. Unya, abi nako og mao na kadto, naa pa diay kami nabitbit nga bugas, pagkaon ug suplay sa balay,” saysay sa usa ka benepisaryo nga nga gikan pa sa isla Bagongbanua.

“Ato nga una na nga gisabut ang mga kapitan nga motabang sila sa pagpasakay sa mga 50 ka mga benepisaryo sa ilang mga isla nga barangay, ug maayo usab kay sabot usab sila nga mingsanong,” matud pa ni Rosco. (RAHC/PIABohol)