4.5 ka adlaw nga holidays,

Masinati sa sunod semana

TAGBILARAN CITY, Bohol, Oct 24 (PIA)—Taas nga week-end ang mapaabut sa mga Pilipino sa sunod semana, kini human gideklara sa Malakanyang ang tunga sa adlaw nga walay trabaho-an sa Huwebes, Octubre 31, kap-os sa paniudto.

Ang taas nga weekend, naglangkob sa tunga sa adlaw sa Oktubre 31, Nobyembre 1 Biyernes nga usa ka regular nga holiday kay adlaw sa mga Santos, Nobyembre 2 Sabado nga adlaw sa mga Kalag, Nobyembre 3, Domingo ug Nobyembre 4, Lunes ug gisaulog sa Bohol ang Carlos P. Garcia Day.

Sa weekend nga nahisgutan, upat og tunga ka adlaw ang bakasyon, butang nga maghatag sa mga Pilipino sa gikinahanglang mga adlaw aron mobyahe sa pagtanda sa mga mahal sa kinabuhi subay sa kinaiya nga Kristohanon, diha sa mga sementeryo ug paglakip na usab sa gikinahanglang suroy aron pagpalaluag sa gibati nga stress gikan sa trabaho.

Kahinumduman nga niadtong Martes, Oktubre 22, gipagawas sa Malakanyang ang Memorandum Circular No. 67 nga nagpasuspenso sa tanang trabaho sa goberno ug klase sa tanang lebel sa pagtungha sugod sa alas 12:00 sa udto, Oktubre 31.

Matud sa MC 67 nga gilagdaan ni Executive Secretary Lucas Bersamin sa katungod ni Presidente Ferdinand Marcos Jr,. kini aron maghatag sa mgf trabahante sa goberno sa kinatubik-ang oportunidad sa pagtuman sa tradisyon sa Adlaw sa mga Santos ug Adlaw sa mga Kalag.

Kini usab mahimong kahigayunan sa pagbyahe paingon ug pauli sa mga lalawigan aron agi og tabang usab sa local nga turismo.

Hinuon, gitataw usab sa MC 67 nga kadtong mga ahensya nga nahilambigit sa pagduso sa batakang nga mag serbisyo sa kasanihan, medical ug pagtubag sa panginhanglan sa katawhan sa panahon sa katalagman ug sa pagtuman sa mga gikinahanglang gimbuhaton sa kagamhanan, kinahanglan gihapon nga dili mabugto ang ilang mga trabaho.

Gitataw usab sa MC nga ang pagsuspenso sa trabaho sa pribadong sector, gitugyan na sa kagamhanan ngadto sa mga pangulo sa mga kompanya ug establisemento. (RAHC/PIA-7/Bohol)