625 ka mga estudyante nakakumpleto sa SPES program

TAGBILARAN CITY, Bohol (PIA)--Ang Special Program for the Employment of Students (SPES) sa Provincial Government of Bohol (PGBh) natapos sa pagbayad sa suholan niadtong Oktubre 8 sa Ceremonial Hall sa Kapitolyo diin nikabat sa 625 ka mga estudyante ang nakabenepisyo sa maong summer job program karong tuiga.

Ang PGBh pinaagi sa Bohol Employment and Placement Office Public Employment Service Office (BEPO-PESO) nipahigayon sa pagbayad sa 60% sa suholan sa mga benepisyaryo nga nikabat sa P7,091 sulod sa 20 ka adlaw nga pagtrabaho.

Ubos sa Republic Act No. 9547 o Expanded SPES law, ang Department of Labor and Employment (DOLE) mohatag sa 40% sa sweldo.

Giabiabi ni Gay Manolong, Manpower Development Officer, ang mga tinun-an sa SPES sa ngalan ni Vilma Yorong, ang BEPO-PESO head.

Samtang si Bise Gobernador Tita Baja, nipadangat og makapadasig nga mensahe ug nidasig sa mga tinun-an nga magkugi aron makab-ot ang ilang mga pangandoy sa maayong kaugmaon.

Ang programa, gituyo aron matabangan ang mga estudyante nga naghinamhinam nga makatapos sa ilang edukasyon, usa ka prayoridad sa administrasyon ni Gobernador Erico Aristotle Aumentado.

Ang gobernador nga girepresentahan ni Metodio Maraguinot Jr., Supervising Administrative Officer, nipahalipay sa mga tinun-an sa pagkumpleto sa SPES program.

Gihatagan og gibug-aton ni Maraguinot nga labaw pa sa kahigayonan nga makakwarta, ang summer job program naghatag og kahigayonan sa pagpauswag sa kaandam sa mga estudyante alang sa tinuod nga kalibotan.

Si Gences Ian Lord Galgo, usa ka benepisyaryo sa SPES, nagpasalamat sa kasinatian sa summer job.

Matud pa niya nga ang programa nagtugot kaniya sa paghashas sa iyang mga kahanas, pagdiskobre sa iyang mga abilidad, pagkaamgo sa iyang potensyal, ug pagtukod sa tibuok kinabuhi nga mga relasyon. Gihatagan usab niini og gibug-aton ang mas dako nga papel nga siya ug ang iyang mga kaubang estudyante sa pagtubo ug paglambo sa komunidad. (ecb/PIA7-Bohol)

Ang SPES program sa Kagamhanan sa Probinsiya sa Bohol gitapos sa pagbayad sa sweldo niadtong Oktubre 8 sa Ceremonial Hall sa Kapitolyo. Ang SPES program nagtumong sa pagtabang sa mga estudyante nga makakuha og dugang nga kita aron masuportahan ang ilang mga galastuhan sa edukasyon samtang nakakuha og bililhon nga kasinatian sa trabaho sa lainlaing mga industriya ug ahensya. (PiMO photo)