Nag-una nga modelo sa disaster

resilient house, tukoron sa Ubay

TAGBILARAN CITY, Bohol, Oct 8 (PIA)—Sugod karon, ang balay nga makasagubang sa katalagman ug ang malungtaron nga panginabuhian sa mga nanimuyo dinhi, nga una nga tukoron sa Bood, Ubay, mao nay hangdon sa tanan nga mga Local Government Units sa nasud aron ilang sundogon.

Kini human gisaksihan sa mga opisyales sa lungsod pinangulohan ni Mayor Constantino Reyes ang paglubong sa kapsula ug ang groundbreaking ceremony sa modelo sa sustainable ug disaster resilient house, Oktubre 8, 2024.

Proyekto na nahanay sa mga inisyatiba sa programa sa Department of Health’s nga “Development and Pilot Implementation of the Health Promotion Playbook for Healthy Communities,” kini nga proyekto gitambayayongan usab sa Ateneo School of Governance-Ateneo Policy Center.

“Kini nga modelo nga balay, atong gilauman nga mamahimong sumbanan sa komunidad nga nanginabuhi sa malungtaron nga paagi samtang nanimuyo sa balay nga gipanday aron makalahutay sa katalagman,” matud ni Mayor Reyes.

Atul sa seremonyas, ang mga namulong, nanghingusog sa mahinongdanon nga pagpanginlabut sa mga komunidad ug sa inambitan nga responsibilidad sa pagpabarug sa usa ka kaugmaon nga makasagubang sa mga hagit sama sa katalagman.

Ang nanguna nga proyekto magtimaan sa mahinungdanon nga lakang paingon sa may himsug, mas napangandam ug makasagubang nga komunidad sa nasud, sa atubangan sa katalagman, kay kini man ang labing una ug mahimong kapahinaminan sa tibuok nasud.

Dugang sa mayor, “niini nga pamaagi, matubag na ang panginahanglan sa komunidad nga kanunay gihulga sa nagkausab nga panahon ug nga katalagman nga mohapos sa katawhan.”

Disto usab mingsaksi sa kalihukan si Sangguniang Bayan Committee for Health Violeta Reyes, Bise Mayor Victor Bonghanoy ug mga representante sa Department of Health, Ateneo School of Governance ug representante nila ni Gob Erico Aristotle Aumentado, Kongresista Vanessa Aumentado, Bokal Jamie Villamor ug katawhan sa lungsod. (rahc/PIABohol)

DINHI MOBARUG. Gihimo sa mga opisyales sa Ubay uban ni Mayor Constantino Reyes ug mga tinugyanan sa Department of Health ug Ateneo School of Governance ang pagpangandam aron ikalubong ang kapsula ug groundbreaking sa modelo nga balay nga makasagubang sa katalagman, didto sa Barangay Bood. (PIABohol/LGU Ubay)