DOH nipahimangno kalabot sa FB page nga

naggamit sa UP-PGH, kanhi nilang opisyal

TAGBILARAN CITY, Bohol (PIA)--Gipahimangnoan sa Department of Health (DOH) ang publiko batok sa Facebook page nga nagpakaaron-ingnon nga Philippine General Hospital (PGH) ug bakak nga gigamit ang pangalan ni Dr. Enrique A. Tayag, kanhi Health Undersecretary.

Kini nagpasiugda sa usa ka pamaagi aron limpyohan ang blood vessels nga nag-ayo kuno sa hypertension ug uban pang mga sakit nga dili matambalan.

Sa usa ka pahayag, giklaro sa DOH nga peke kining Facebook page ug dili kini kaanib ni Dr. Tayag ug wala usab gi-endorso sa UP-PGH ug sa departamento.

Naglihok na usab ang departamento pinaagi sa pagtaho sa mga peke nga link sa panid sa Department of Information and Communications Technology (DICT) aron matangtang kini.

Matud pa nga hangtod nga masulbad, ang bisan unsang mga pahayag, komento, o mga transaksyon gikan niining mga account gi-isip nga malimbungon.

Ang DOH nipasidaan nga ang padayon nga pag-post niini mahimong mosangpot sa mga kaso nga kriminal ug nag-awhag sa publiko nga magsalig lamang sa mga opisyal nga social media sa departamento. (ecb/PIA7-Bohol)

Gipahinumdoman sa DOH ang publiko nga magbantay sa mga fake news ug kanunay e-beripika ang mga impormasyon nga makita online sa mga lehitimong tinubdan lamang. (DOH/PIA7-Bohol)