DOLE nagpagawas og guidelines alang sa

saktong suholan sa Nobyembre 1, 2 ug 30

TAGBILARAN CITY, Bohol (PIA)--Nagpagawas ang Department of Labor and Employment (DOLE) og guidelines alang sa saktong suholan sa nagsingabot nga mga holidays nga mao ang All Saints Day sa Nobyembre 1, All Souls Day sa Nobyembre 2 ug Bonifacio day sa Nobyembre 30.

Sa advisory nga gipagawas sa DOLE, nagpahinumdom ang ahensya sa mga empleyado ug mga employer nga sa Nobyembre 1 ug 2 nga parehong special non-working holidays, sundon ang ‘no work no pay.’

Apan sa mga motrabaho sa maong mga adlaw, ang mga empleyado makadawat sa ilang regular nga inadlaw nga suholan ug adunay dugang 30%. Alang sa overtime work, makadawat sila og dugang 30% sa ilang hourly rate.

Sa mga motrabaho sa maong special holiday nga natunong sa ilang rest day, ang mga empleyado angay nga makadawat og dugang 50% sa ilang regular daily wage alang sa unang 8 ka oras ug dugang 30% sa ilang hourly rate alang sa overtime.

Samtang alang usab sa Bonifacio day nga usa ka regular holiday, makadawat pa gihapon ang empleyado sa ilang tibuok adlaw nga sweldo bisan dili mosulod sa trabaho basta mosulod sa trabaho o naka-leave with pay sa sunod nga adlaw.

Ang mga empleyado nga motrabaho sa regular holiday makadawat og double pay ug dugang 30% sa ilang hourly rate alang sa overtime work.

Ug ang mga motrabaho usab sa regular holiday nga natunong sa ilang rest day makadawat og double pay ug dugang 30%. Alang sa overtime, makadawat og dugang nga 30% sa ilang hourly rate.

Ang DOLE nag-awhag sa mga amo sa pagsunod niini nga mga giya aron masiguro ang patas nga mga gawi sa pamuo ug mapanalipdan ang mga katungod sa mga mamumuo. (ecb/PIA7-Bohol)