DSWD, gi-awhag ang mga benepisyaryo

sa 4Ps nga magparehistro sa PhilSys

TAGBILARAN CITY, Bohol (PIA)--Gi-awhag sa pamunoan sa Department of Social Welfare and Development (DSWD) ang mga benepisyaryo sa 4Ps nga magpatala sa Philippine Identification System (PhilSys).

Matud pa sa ahensya, kinahanglang magparehistro sila sa ilang demographic ug biometric information.

Kini agi na usab og pagsunod sa direktiba ni DSWD Kalihim Rex Gatchalian nga nagtumong sa pagpasaka sa numero sa mga 4Ps member nga adunay National ID.

Matud pa nga makatabang usab kini aron mas mahimong dali ang paghatag sa conditional cash transfers sa mga benepisyaryo sa programa.

Gidugang pa sa ahensya nga parti usab kini sa mga program requirements sa mga benepisyaryo aron magpadayon ang pagdawat nila og tabang gikan sa gobyerno.

Kahinumdoman nga nagtambayayong ang DSWD ug Philippine Statistics Authority (PSA) alang sa pagrollout sa Philsys registration alang sa tanang 4Ps member bisan asang suok sa nasud. (ecb/PIA7-Bohol)

Makatabang ang pagbaton og national ID sa mga 4Ps member aron mas mahimong dali ang paghatag sa DSWD sa conditional cash transfers sa mga benepisyaryo sa programa. (DSWD/PIA)