2-tuig nga tour of duty ni Col Batuan

Hulga sa rebelde gipupog,

libreng pabalay gipabarug

TAGBILARAN CITY, Bohol Oct 21 (PIA)—Gitapos ni Police Colonel Lorenzo Alfeche Batuan ang duha ka tuig nga termino isip labing taas nga opisyal sa kapolisan sa Bohol bitbit ang garbo sa lider nga nakapakita sa duha ka kamot sa kagamhanan.

Sa labing dayag nga operational accomplishment highlight, ilawom ni Colonel Batuan nagpakita sa isug nga kamot sa balaod, dihang napahagsak niini ang nahibilin nga kamada sa armadong pundok sa mga rebelde, sa engkwentro didto sa Campagao Bilar nga nagpalubong sa liderato sa mga New People’s Army sa Bohol.

Sa Administrative accomplishment, o sa maluloy-on nga kamot sa kagamhnan, labing dayag nga accomplishment ang pagturn-over sa 36 na ka libreng alagad ug balay (LAB) alang sa mga Law Abiding Boholanos.

Kini ubos sa pakigtambayayong sa banay nga Aumentado ug mga kapulisan nga nagtampohay sa ilang tabang uban usab sa pangalagad sa mga katawhan ug opisyales sa kalungsuran.

Mismo si Police Regional Director Police Brig General Anthony Aberin ang mingtaud sa Medalya ng Kasanayan ngadto kang outgoing Provincial Director Batuan kinsa minglingkod sa pwesto sa Bohol Police Office Oktubre 21, 2022, hangtud nahuman niya ang duha ka tuig nga tour of duty sa Bohol.

Sa laing bahin, gitunol ni Col Batuan ngadto sa bag-ong Bohol Provincial Director Police Colonel Ariel Banzon ang command flag, inventory of properties ug plans and programs brochure, isip sunod nga provincial commander sa Bohol PNP, atubangan sa tanang mga hepe sa kapolisan sa Bohol ug mga opisyales sa Kampo Dagohoy.

SI Police Brig Gen Aberin, PNP Regional Director, ngadto sa bag-ong PD Banzon, mihagit sa bag-ong hepe nga kon dili man malabwan ang accomplishment ni outgoing PD Batuan, bisan na lang matupngan.

Si Gen Aberin, mipadayag sa mga Bol-anon nga siya misaligon usab kang Banzon, kinsa iyang gikauban sa Regional Office sa usa ka tuig ug unom ka buwan, nga iyang gipaabut ang way puas nga pag-pangulo sa kampanya batok sa illegal drugs, criminality, POGO, ug uban pang criminal elements.

Full adherence sa police operational procedures, kini usab ang mandu ni Gen Aberin ngadto sa mga elemento sa kapolisan ubos na karon ni Col. Banzon. (RAHC/PIA_7/Bohol)

LISUD TUPNGAN. Gitapos ni Col Lorenzo Batuan ang termino isip hepe sa Bohol Police nga nagpakayab sa lisud tupngan nga accomplishment, matud ni PNP RD BrigGen Anthony Aberin. (PIABohol)

BAG-ONG HEPE. Gitunol ni PNP Regional Director BGen Anthony Aberin ang command flag gikan ni outgoing PD Lorenzo Batuan ngadto ni incoming PC Col Ariel Banzon, ditto sa turn over of command sa Campo Dagohoy Oct 21, 2024. (PIABohol)