“El Nino Intervention” sa OPA,

Climate Resilient Irrigation na

TAGBILARAN CITY, Bohol, Oct 9 (PIA)—Dala sa kalangan sa pagpatuman sa proyekto nga alang unta sa interbensyon sa El Nino subay sa Resolusyon sa Sangguniang Panlalawigan (SP), usbon na ang titulo sa nahisgutang proyekto ngadto na sa Climate Resilient Irrigation Intervention for Farmers.

Proyekto nga gipatuman sa Office of the Provincial Agriculturist, minglabay na lang ang El Nino, apan wala mapatuman kay gikataho nga nalangan ang supplier sa pagdeliver sa mga himan nga magamit unta alang sa suporta sa patubig sa mga umahan.

Ug sanglit dili na haum ang proyekto karon nga wala nay El Nino, gikinahanglan na usab ni Gobernador Erico Aristotle Aumentado nga ipa-usab ang SP Resolution No. 2024-352 aron mahimo pa nga pirmahan ni Aumentado ang mga memorandum of Agreement (MOA) nga magtali sa mga nalakip sa proyekto.

Segun pa ni Provincial Agriculturist Liza Quirog, ang gilaraw nga El Niño Intervention 2024 Project naglangkob sa pagpanghatag og 402 ka units sa bomba sa tubig (water pumps), 4,500 ka plastic nga baril saudanan sa tubig, ug 2,809 ka rolyo sa tag 100 metros nga polyethelyne water hose ngadto sa kwalipekado nga mga hugpong sa mga mag-uuma, aron ilang magamit pangontra sa El Nino.

Sa aprobado nga SP Resolution No. 2024-352, kini naghatag og katungod sa gobernadora nga maoy representante sa Bohol aron maglagda sa MOA.

Apan sa kinahanglang usabon nga pangalan sa proyekto aron dili mosango sa Commission on Audit, laing ordinansa na usab ang kinahanglan aron magtugot pag-usab sa gobernadora nga molagda sa bag-ong gihinganlang proyekto.

Hinuon, segun sa gobernador, ang inisyatiba sa Climate Resilient Irrigation Intervention alang sa mga mag-uuma, gikinahanglan pa gihapon kay aduna pa gihapo’y panginahanglan sa malungtaron nga solusyon nga makasagop sa mga kausaban nga dala sa Climate Change ug magseguro sa tubig alang sa mga tamnanan, lukop sa Bohol.

May mga irrigation facilities man ang Bohol, ang proyekto, adto na padulong sa mga gagmay nga mag-uuma nga walay ikasarang alang sa pagpatukod og mga imprastraktura nga makapasagubang kanila sa nagka-usab nga panahon.

Kini maoy kasagaran nga suliran nga ang mga mag-uuma nga dili na maabut sa irigasyon, magkasuliran sa ilang abut, ug kita gikan sa ilang kahagu. (RAHC/PIA-7/Bohol)