Epekto sa unang Cloud seeding

14,000 ektaryas nga

basakan, natamnan

TAGBILARAN CITY, Bohol Sept 30 (PIA)— Human sa una nga cloud seeding operations nga gipasiugdahan sa Kagamhanang Probinsyal sa abag sa Department of Agriculture, nakab-ot sa Bohol ang pagpatubig sa 14,943 ektaryas nga kabasakan, nga ma-impas na unta tungod sa taas nga lanat sa huwaw.

Kini maoy gipaambit ni Assistant Provincial Agriculturist Larry Pamugas, didto sa ikatulo nga Full Council Meeting sa Provincial Disaster and Risk Reduction Management Council, didto sa Sangguniang Panlalawigan Session Hall sa Kapitolyo.

Kahinumduman nga sa pagsugod sa tingtanum sa wet cropping season sa Mayo niining tuiga, naglaum ang kadaghanan nga magatrabaho na sa mga basakan human gideklara sa Philippine Atmospheric Geophysical and Astronomical Services Administration (PAG-ASA) ang pagsugod sa ti-uwan sa Hulyo.

Apan, sukwahi sa tituohan, milanat pa gihapon sa taas nga panahon nga way below normal ang uwan, hinungdan nga napugos na lamang ang National Irrigation Administration (NIA) sa pagkunhod sa mga basak nga ilang mapatubigan, sa kakuwang usab sa tubig sa Malinaw Dam.

Maayo na lang kay ang Department of Agriculture Bureau of Soil and Water Management nakapagawas og P5,017,280.00 aron magamit alang sa cloud seeding operations ug masalbar ang panginahanglan sa programa sa humay alang sa nasud.

Pinaagi niadto, matud ni Pamugas nga nakahimo ang cloud seeding contactor sa 34 ka lupad alang sa paggamit sa 50 ka oras nga magpakatag sa 340 ka sako nga asin aron ikati sa uwan nga matagak sa mga lugar nga buot pauwanon tungod sa kadaghans a humayan nga naghuwat sa uwan aron makatanum.

Tuod man, gikan sa kapin sa us aka libo ka ektarya nga mao lamang ang unang makaya sa pagpatubig sa NIA, nakab-ot sa Bohol ang 14,000 ektaryas human sa 50 ka oras nga cloud seeding, tumbok ni Pamugas.

Gawas pa sa humayan nga natrabaho ug natamnan, nakadaginot usab ang Bohol sa 1,164 ka ektarya nga maisan nga natamnan ug nakasanggi na gani ang uban, taho ni Pamugas.

Gani, dugang sa assistant provincial agriculturist, sa hybrid corn seed nga ilang gipang-apod-apod sa mga mag-uuma, may mga kamaisan pa nga nga laras sa Fall Army Worm ug uban pang matang sa dangan nga ming-atake sa mga kamaisan nga kasagaran mahitabo human sa huwaw.

Ang mga kamaisan nga nakalabang sa pagsuway, nakapananggi og minghalin na og mas maayo nga presyo ang pamaligay, saysay ni Pamugas.

Sa taho sa OPA, wala pa iapil sa kwenta ang epekto sa pagpananum human sa ikaduga nga cloud seeding.

Kahinumduman nga sa buwan sa Agosto, napundohan sa PDRRM ang P2.5 million alang sa dugang nga cloud seeding, pagluwas sa mga nakasugod og pananum apan namad-an ang basakan. (RAHC/PIA-7/Bohol)

NAKATUBIG, NAKATANUM. Gikan sa 1,000 ektarya nga basakan na mao ray uannag maalagaran sa patubig sa NIA, mikabat sa 14,000 ektaryas ang nakatanum human gipahiluna sa Bohol ang cloud seeding operations, nga nakapa-ugmad usabs a mga kamaisan nga hulip sa mga bakasan nga dili kahatagan sa patubig sa kakuwang sa uwan, taho ni Asst Agriculturist Larry Pamugas. (PIABohol)