2 samples sa gidudahan’g

monkeypox, nagnegatibo

TAGBILARAN CITY, Bohol Sept 30 (PIA)— Negatibo ang resulta sa mga samples nga gipadala sa Bohol ngadto sa Research Institute of Tropical Medicine (RITM) aron ipakompirmar kon ang gidudahang mga simtomas iya ba sa gikahadlokan nga monkeypox (Mpox).

Kini maoy gipaambit ni Provincial Health Officer Dr. Cesar Tomas Lopez ngadto sa mga sakop sa Provincial Disaster and Risk Reduction Management Council sa ika tulo nga quarter Full Council Meeting niini didto sa Sangguniang panlalawigan Session hall, Septembre 30.

Ang Mpox usa ka matang sa impeksyon nga kagaw ang kina-ingnan, ug kini magpakita sa mga pantal-pantal nga sakit hilamon, mamubotburot ang panit ug ubanan sa pagpanghubag sa mga lutahan, hilanat, labad sa ulo, panakit sa kaunoran, panakit sa likod ug pagkaluya.

Matud ni Dr. Lopez, may duha ka gidudahan nga kaso sa Mpox sa Bohol nga buot nga makompirmar sa mga tinugyanan sa RITM.

Ang RITM maoy giahasan sa pagplano ug pagpatuman sa mga programa sa pagpanuki-duki sa mga kinaiya ug dagway sa mga sakit nga mananakod nga igkita dinhi sa mga nasud nga medyo init-init.

Sa mga gidudahang natakdan sa Mpox, usa niini 20 anyos nga lalaki gikans a Getafe ug 7 anyos nga bata nga lalaki sa Tagbilaran City, ang ilang giduso nga mga samples, pulos negative, matud ni Dr. Lopez.

Samtang ang Mpox Bohol mahimong ma-ayo ra human sa pipila ka semana bisan kon dili tambalan, may nga panagsang kaso usab nga ang may Mpox, namatay.

Ang Mpox kasagarang ngapatakod pinaagi sa mga duga sa lawas, o kadtong mga samad sa lawas sa tawo nga may mpox, o direkta nga makahilam sa mga butang nga natrapo sa mga duga sa lawas sama sa sienna, tualya ug mga hapin sa katre.

Mahimong mopakita sa timailhan ang tawo nga nakakauhag kagaw sa Mpox, human sa 7 ngadto sa 10 adlaw, apan matud ni Dr Lopez, kon ang tawo magbansay ra gihapon sa kasagaran nga bansay sa limpyo ug luwas nga kinabuhi, menos ang posibilidad nga matakdan.

Kon matakdan man ugaling, sama sa pagdumala sa COVID, ang pasyente kinahanglan sa estrikto mnga isolation, permi manghunaw, social distancing ug magpaneguro nga may igo nga panalipod sa lawas sama sa bitamina ug minerals. (RAHC/PIA-7/PIABohol)

DILI DIAY MPOX. Negatibo, matud npa ni PHO Dr Cesar Tomas Lopez ang duha ka samples nga nakuha gikan sa mga gidudahang mga Bol-anon nga natakdan sa monkeypox, human matuki sa RITM. Hinuon, kon subayon lamang ang mga bansay sa COVID, dili ra kayo kahadlokan ang mpox, dason sa mananambal. (PIABohol)