Museums and Galleries Month gibuksan sa Bohol

uban sa pagsaulog sa kultura ug kabag-ohan

TAGBILARAN CITY, Bohol (PIA)--Opisyal nga gibuksan sa National Museum of the Philippines (NMP)-Bohol ang Museums and Galleries Month (MGM) 2024 pinaagi sa pagpahigayon og lecture series nga giulohan og “Why Museums Matter” niadtong Martes, Oktubre 1.

Gipahigayon sa CPG Courtyard sa NMP-Bohol, ang maong kalihokan gipasiugdahan ni Atty. Ma. Cecilia U. Tirol, Visayas National Museums Director II, isip keynote speaker.

Ang MGM karong tuiga nagdala sa tema nga "Honoring Traditions, Fostering Innovations,” nga nagpasiugda sa kamahinungdanon sa pagbalanse sa kultural nga kabilin sa modernong mga pag-uswag.

Ang Panggamhanan sa Probinsiya sa Bohol, pinaagi sa Center for Culture and Arts Development (CCAD), hugot nga nagsuporta sa selebrasyon diin nagpasiugda sa kahimtang sa lalawigan isip labing una ug bugtong UNESCO Global Geopark sa Pilipinas ug ang dedikasyon niini sa pagpreserbar sa kultural nga kabilin.

Atol sa open forum, gitubag ni Tirol ang lain-laing mga pangutana, lakip na ang mahitungod sa designation sa UNESCO sa Bohol ug ang suporta nga gihatag sa lokal nga kagamhanan.

Ang mga tour guide nakamatikod sa pagsaka sa gidaghanon sa mga turista sukad sa UNESCO Global Geopark designation, uban sa daghang mga bisita nga nagpahayag sa pagkamausisaon mahitungod sa maong pag-ila sa lalawigan.

Ang MGM, nga gisaulog matag Oktubre sa Pilipinas, nagpasidungog sa mga museyo ug mga galeriya sa nasud samtang nagpalambo sa nasudnong garbo ug panimuot. Gipasiugda niini ang kamahinungdanon sa koneksyon tali sa arte, kultura, ug pagtukod sa nasud.

Gideklara pinaagi sa Presidential Proclamation No. 798 niadtong 1991, ang kalihokan nagpakita sa mga eksibisyon nga naglangkob sa panaghiusa ug nasudnong pagkatawo, nga nagpasiugda sa mahinungdanong papel sa cultural heritage sa pag-umol sa kaugmaon sa nasud.

Isip kabahin sa selebrasyon sa MGM, ang NMP-Bohol mo-host og sunod-sunod nga plenary lectures, lakip na ang mga diskusyon sa storytelling, conservation, ug global geoparks. Pagkahuman sa mga lektyur, ang mga partisipante isuroy sa mga mga nabantog nga lokal nga museyo sama sa Museo Parroquial de Baclayon sa Oktubre 11, Amarela Resort Art Gallery sa Oktubre 18, ug Nova Shell Museum sa Oktubre 25.

Kini nga mga kalihokan, nga gipahigayon sa pakigtambayayong sa Panggamhanan sa Probinsiya sa Bohol ug partner-museums, nagtumong sa pagpalawom sa mga partisipante sa pagdayeg sa kultural nga kahulogan, ilabi na sulod sa Bohol Island Geopark. (ecb/PIA7-Bohol)

Gibuksan sa National Museum of the Philippines (NMP)-Bohol ang Museums and Galleries Month (MGM) pinaagi sa lecture series, "Why Museums Matter" ni Visayas National Museums Director II, Atty. Ma. Cecilia U. Tirol isip keynote speaker niadtong Oktubre 1, 2024 nga gipahigayon sa CPG Courtyard sa NMP-Bohol. Gitambongan kini sa mga miyembro sa academe ug organisasyon sa mga lokal nga tour guide sa Bohol. (ecb/PIA7-Bohol)