‘Sabado Nights Sa Museo’

sa tibuok buwan sa Oktubre

TAGBILARAN CITY, Bohol (PIA)--Isip kabahin sa selebrasyon sa Museums and Galleries Month (MGM) 2024, ang National Museum of the Philippines (NMP)-Bohol magpahigayon og "Sabado Nights Sa Museo" sa tibuok buwan sa Oktubre.

Kining espesyal nga kalihokan magpakita sa dato nga kabilin ug lagsik nga kultura sa Bohol Island Geopark pinaagi sa usa ka nindot nga Crafts and Crops Bazaar.

Ang mga mahiligon sa museyo malingaw sa lamiang pagkaon ug ilimnong Boholano nga isilbi sa azotea.

Atol sa Kapihan sa PIA niadtong Oktubre 2, gi-awhag ni NMP-Bohol Head Rachelle Lacea ang publiko sa pagbisita sa museyo sa Bohol ug tilawan ang mga tradisyonal nga pagkaon ug ilimnon sa Bohol, samtang nagsuporta lokal nga mga artesano.

Ang mga konsesyonaryo naglakip sa Tubigon Raffia Gallery, Purple Women, Makata Shirts PH, YMMYLYN ART, DYNA 3D, VM Museum & Gallery, ug Weave Joy.

Kini ipahigayon tanang Sabado ning buwan sa Oktubre gikan alas 5 sa hapon taman alas 10 sa gabii ug libre ang pagsulod sa NMP-Bohol.

Samtang bukas sa publiko ang NMP-Bohol gikan sa adlaw’ng Martes hangtod Domingo, gikan alas 9 sa buntag hangtod alas 5 sa hapon.

Ang mga bisita makasuhid sa makaiikag nga mga exhibit, lakip ang usa ka instalasyon nga nagpakita sa katahom sa ilawom sa dagat sa Danajon Bank Double-Barrier Reef sa Tubigon Raffia Gallery, nga nagtanyag sa usa ka daklit nga pagtan-aw sa mga natural nga katingalahan sa Bohol. (ecb/PIA7-Bohol)

Gi-awhag sa National Museum of the Philippine (NMP)-Bohol, nga nahimutang sa km 0, sa Old Capitol Building ang publiko sa pagbisita sa ilang museo agi og pagsaulog sa Museums and Galleries Month (MGM) sa buwan sa Oktubre. (NMP-Bohol)

Makita sa National Museum of the Philippines (NMP)-Bohol ang makaiikag nga instalasyon nga nagpakita sa katahom sa ilawom sa dagat sa Danajon Bank Double-Barrier Reef sa Tubigon Raffia Gallery, nga nagtanyag sa usa ka daklit nga pagtan-aw sa mga natural nga katingalahan sa Bohol. (ecb/PIA7-Bohol)