‘Lakbay Alalay’ gi-activate sa

DPWH alang sa Kalag-kalag

TAGBILARAN CITY, Bohol (PIA)--Gi-activate sa Department of Public Works and Highways (DPWH) ang Lakbay Alalay Motorists Assistance Program aron makatabang sa pagsiguro sa kaluwasan sa kadalanan ug hapsay nga pagbiyahe atol sa pagsaulog sa All Souls’ Day ug All Saints’ Day.

Sa gipagawas nga pahayag ni DPWH Kalihim Manuel Bonoan, niingon kini nga iya nang gimando ang deployment sa composite teams ngadto sa mga strategic locations sa tibuok nasod aron madumala ang gipaabot nga pagdagsang sa mga motorista, ilabina gikan sa alas 8:00 sa buntag sa Oktubre 31, 2024, hangtod sa alas 5:00 sa hapon sa Nobyembre 2, 2024.

Kini nga mga DPWH Lakbay Alalay Teams, matud niya, gilangkoban sa mga uniformed field ug crew personnel nga motrabaho sa round-the-clock shift sa ilang gitudlo nga mga estasyon.

Matud pa niini nga gipaabot ang pagdagsa sa mga motorista alang sa Undas 2024 maong ilang gipalihok ang ilang Lakbay Alalay Motorists Assistance Stations aron mahatagan dayon og kasaligan nga tabang ang mga nagbiyahe nga publiko.

Ang DPWH Regional ug District Engineering Offices sa tibuok nasod aktibo usab nga nagpahigayon og routine maintenance activities sa mga national roads, ilabina sa mga rota paingon sa mga sementeryo ug simbahan.

Dugang pa, ang mga nag-implementar nga mga opisina nga adunay nagpadayon nga mga proyekto sa mga dagkong ruta gimandoan sa pag-align sa mga iskedyul sa proyekto, lakip ang pag-instalar sa mga road safety signage ug mga pahimangno sa trapiko, aron malikayan ang paghuot sa trapiko ug mga aksidente.

Ang DPWH nakigtambayayong usab sa ubang mga ahensya sa gobyerno, apil ang Land Transportation Office (LTO), Philippine National Police (PNP), ug local government units (LGUs), alang sa bisan unsang gikinahanglang tabang. (ecb/PIA7-Bohol)

Ang DPWH nagpahigayon usab og massive cleanup drives ug repair works sa mga nasudnong dalan ug mga taytayan aron masiguro ang road safety ug episyente nga kasinatian sa pagbiyahe alang sa umaabot nga All Souls Day ug All Saints Day. (DPWH/PIA)