Kabag-on sa mga kabus

Dinhi sa Bohol mikubos

TAGBILARAN CITY, Bohol, Oct 28 (PIA)— Sa tulo ka tuig nga gisundan sa Philippine Statistics Authority (PSA) ang dagan sa insidente sa kapobrehon sa Bohol, nabutyag didto sa Data Dissemination atul sa ika 35 nga National Statistics Month nga mingkubos ang poverty incidence sa Bohol sa 2023.

Gibutyag ni PSA supservising statistical analyst Emmanuel Galab sa Official Poverty Statistics sa 2023 ds tibuok rehiyon nga sa poverty incidence sa mga banay sa Bohol, gikan sa 2021 nga anaa sa 19.1 percent, mingpadayon pa sa pagkanaug ang kadaghanon sa anaa sa kalisud sa 2023 nga mingtala na lamang sa 14.8 percent.

Hinuon, kon itandi ang kadaghanon sa mga kabus nga banay sa 2018 ngadto sa 2023 data nga gikan sa PSA, dyutay ra ang kausaban sa kadaghanon sa mga anaa sa kalisud.

Sa 2018, ang poverty incidence sa mga banay sa Bohol natala sa 15.5 percent, nga mingsaka ngadto sa 19.1 sa 2021.

Kahinumduman nga ang 2020-2021, mao ang mga katuigan nga ang katawhan napalug-og sa hulga sa pandemya, kanus-a usab daghan ang nawad-an sa trabaho ug panginabuhi-an, butang nga nakatampo sa kalisud.

Apan sa pagtak-op sa 2023, nakit-an sa PSA nga ang poverty incidence sa mga banay sa Bohol, anaa na sa 14.8 percent, matud ni Galab.

Sa poverty incidence ug sa kalapdon sa mga kabus sa kinatubuk-an nga populasyon sa Central Visayas, sa Bohol niadtong 2018, anaa sa 209,000 ka mga banay ang anaa sa kalisud.

Kini napun-an pa sa panahon sa pandemya, diin natala ang 238,000 ka banay ang anaa sa kawad-on.

Apan sa 2023, human sa mga interbensyon nga gihimo sa kagamhanan, mikanaug ang kadaghanon sa mga kabus nga banay sa Bohol, ngadto na sa 190,000.

Gani, tungod niini, miawhan na si Gobernador Erico Aristotle Aumentado ngadto sa mga ahensya sa kagamhanan nga nagtutok sa pagpakunhod sa kawad-on ug kalisud sa paghugop sa tabang ngadto na sa mga kalungsuran nga may daghang natala nga kabus.

Niadtong 2018, ang average poverty threshold sa matag buwan, banay sa Bohol nakalansang sa P10,879.00, o kon ang tibuok banay dili mokita og P10,879 matag buwan, isipon na sila nga kabus.

Sa 2021, kon dili makaabut sa 11,189 ang kita sa usa ka banay sa us aka buwan, mayhap na sila lakip sa mga naglisud, samtang sa 2023, gikinahanglan sa usa ka banay sa Bohol nga mokita og labaw pa sa P12,909 matag buwan aron dili na mahilakip sa mga isipon nga naa sa kawad-on, pasabut ni Galab. (PIABohol)

MAS MIKUNHOD ANG KABUS. Subay sa mga datus nga nakolekta sa PSA, napakita nga gikans a 2018, adunay pagkunhod sa kabag-on sa mga kabus nga banay sa Bohol, bisan pa nga sa 2021, mingdaghan ang kabus, tungod kay daghan usab ang nangapapha sa trabaho tungod sa pagkahagsak sa ekonomiya dala sa pandemya. Apan sa 2023, namatikdan nga mong-untol nag balik ang ekonomiya ug sa pagpamalik sa negosyo, nagsugod og balik ang trabaho ug mikunhod dayon ang kawad-on, nga ubos pa kay sa 2018 nga kadaghanon. (RAHC/PIABohol)