Clean, renewable energy

Code, ordinansa na dinhi

TAGBILARAN CITY, Bohol, Oct 28 (PIA)— Kadtong mamuhunan sa mga proyekto sa renewable energy (RE) dinhi sa Bohol ug naka-apply sa insentibo ubos sa ordinansa sa Bohol Economic Development and Investment Code (BEDIC) mahimong dili makabayad sa buhisan sa real property sa lima ka tuig.

Kini maoy usa sa mga tanyag sa Provincial Ordinance No 2023-018, nga mas nailhan nga Clean and Renewable Energy Code of Bohol, nga napagawas sa Sangguniang Panlalawigan, pinaagi usab sa sponsorship ni Board Member ug abogada Jiselle Rae Villamor.

Ang nasakop sa RE nga gipasabut sa ordinansa , mao ang tinubdan nga migamit sa biomass, geothermal, hydropower, run of river hydro, ocean energy, solar o wind energy alang sa power generation, o kadtong hybrid systems nga migamit sa bisan unsa nga kombinasyon sa mga renewable energy sources nga migamit sa teknolohiyang RE.

Ang nasampit nga ordinansa naghatag og dugukan alang sa mas paspas nga pagduso sa kaugmaran pinaagi sa paggamit sa tinubdan sa RE, ug sa paglatid sa mas lapad nga paggamit sa ingon niining limpyo nga tinubdan sa gahum dagitab, pasabut ni Atty Villamor, kinsa mao na usab ang SP Tourism Committee Chair.

Niana nga direksyon, gimandu sa ordinansa nga ang tanan nga mga kaugmaran sa Bohol, kinahanglan na nga magsukip na sa RE component, agi og dayag ga tinguha sa mga Bol-anon nga manguna sa pag-ugmad ug paggamit sa enerhiya nga nakuha gikan sa RE.

Giaghat usab sa ordinansa nga ang tanang establisemento sa Bohol moapil na sa Green Energy Option Program nga gipakayab sa Department of Energy, samtang gisugyot ngadto sa mga konsumidor nga mo-apil sa net-metering program sa kagamhanan.

Ang Net Metering Program, nga gisagop sa Republic Act 9513, usa ka sistema diin ang tagbalay nga may kaugalingon usab nga power generation pinaagi sa solar energy o pagharvest sa solar power pinaagi sa panels ug uban pang tinubdan sa RE aron may ika-tampo sa kinatibuk-an nga koryente sa grid, kobrahan lamang sa ilang konsumo human makahatag sa ilang nakolekta nga suplay ngadto sa grid.

Ug agi og pagseguro nga modaghan ang paggamit sa RE dinhi sa Bohol, moisip sa RE nga mga tinubdan nga prayoridad sa pagpakatay paingon sa Bohol ug magpetisyon sa DOE ug sa Energy Regulatory Commission nga ikadeklara ang koryente nga gikan sa RE sources nga prayoridad alang sa pagpakatay sa Bohol.

Gani, particular usab nga gimandu sa ordinansa nga dili na mahimo nga magtukod og bisan unsa nga planta nga mogamit sa ulin, basta sulod sa teritoryo sa Bohol, subay usab sa unahauna na nga No Coal Policy dinhi. (RAHC/PIA_7/Bohol)

MAS DAGHAN NGA RE SOURCES. Tumong sa ordinansa sa Bohol nga padaghanon ang pagpakatay sa koryente nganhi sa Bohol nga gikan sa limpyo ug kasaligan nga tinubdan sama sa solar nga makita sa ibabaw, kay sa gikan sa hugaw nga fossil fuel, mao nga ang mamuhunan alang niining mga proyekto, tanyagan sa libre nga buhisan sa real property sulod sa lima ka tuig, sugod sa pagpa-aprobar sa proyekto sa Bohol Investment Board. (PIABohol)