P29/kg nga bugas gisugdan na’g pamaligya

sa mga huyang nga sektor sa Bohol

TAGBILARAN CITY, Bohol (PIA)--Gisugdan na sa gobyerno ang pagbaligya og P29 matag kilo nga bugas sa pipila ka buhatan sa National Irrigation Administration (NIA) ngadto sa mga huyang nga sektor sa lalawigan sa Bohol.

Niadtong Oktubre 23, gilusad sa NIA Region VII ang pagbaligya sa 'Bagong Bayaning Magsasaka (BBM) Rice @P29' sa NIA Bohol Integrated Irrigation System (BIIS) Farmers' Hall sa Poblacion, lungsod sa Pilar.

Kinatibuk-ang 952 ka sako sa bag-ong ani ug gigaling nga bugas ang gibaligya sa tag P290 kada sako (10kilos/bag) sa mga huyang nga miyembro sa komunidad nga naglakip sa senior citizens, solo parents, 4Ps beneficiaries, ug persons with disabilities (PWD) nga adunay limit sa usa ka sako matag tawo lang.

Usa sa mga nakadawat si Emeliana N. Tecson, 78 anyos nga taga Poblacion Pilar, mapasalamaton kay ang 10 ka kilo nga bugas makaigo na sa ilang panginahanglan sulod sa duha ka semana.

“Lami unta og magkanunay kini,” matud pa ni Tecson.

Samtang si Melvey Palapar, 25, solo parent, nagpasalamt usab sa gobyerno sa barato nga bugas.

“Daku na kini og tabang ug hiaot nga magpadayon pa kini,” matud pa ni Palapar.

Sa tulo ka adlaw nga Kadiwa Ng Pangulo nga gipahigayon sa Tagbilaran City Hall gikan niadtong Oktubre 23-25, gibaligya usab ang BBM nga P29 matag kilo nga bugas ngadto sa mga huyang nga komunidad.

Tungod sa hilabihan nga panginahanglan, ang stock sa bugas nga gigahin alang sa kalihokan dali nga nabaligya sa unang duha ka adlaw sa kalihokan.

Agig tubag, gidugangan sa NIA ang suplay ngadto sa 300 ka bags alang sa katapusang adlaw sa Kadiwa Ng Pangulo sa Tagbilaran City niadtong Oktubre 25.

Nikabat sa 500 ka sako o 5,000 ka kilo ang gibaligya sa maong 3 ka adlaw nga kalihokan.

Niadtong Oktubre 25 usab, walo ka gatos ka sako sa 10 kilos nga bugas ang gibaligya usab sa NIA Capayas Office sa Calanggaman, lungsod sa Ubay.

Ang mga panghitabo nagpaila sa pagsugod sa panahon sa pag-ani ug usa ka milestone human sa malampusong pagpatuman sa Farming Support Services Program (Contract Farming) sa NIA, nga naghatag og P50,000 kada ektarya sa mga mag-uuma alang sa mga liso, abono, ug salapi.

Matud pa ni NIA-7 Regional Manager Engr. Rory F. Avance atol sa paglusad sa pagbaligya sa BBM Rice sa lungsod sa Pilar niadtong Oktubre 23, ang Farming Support Program sa NIA nga P50,000 kada ektarya nakahatag og gahom sa mga mag-uuma sa pagbuntog sa mga babag sa panalapi, nga nakapahimo sa mga mag-uuma sa hingpit nga pagtikad sa ilang yuta ug pagpalambo sa abot sa pananom. Tungod niini, ang programa makatabang sa pagpausbaw sa pagkaanaa sa bugas sa mas barato nga presyo sa komunidad. (ecb/PIA7-Bohol)

BBM Rice @P29. Ang mga lumulupyo sa lungsod sa Pilar namalit og mas baratong bugas nga gibalor og P29 matag kilo sa NIA Bohol Integrated Irrigation System (BIIS) Farmers' Hall sa Poblacion, lungsod sa Pilar niadtong Oktubre 23, 2024. (ecb/PIA7-Bohol)