P28 M nga mga pasilidad

Gitugyan ngadto sa CPG

TAGBILARAN CITY, Bohol, Oct 16 (PIA)— Sa usa lamang ka adlaw, natugyan sa kagamhanan pinaagi ni Gob Erico Aristotle Aumentado ug asawa niini nga si Kongresista Vanessa Aumentado ang P28 milyones nga mga pasilidad sa kagamhanan nga magamit sa katawhan sa isal nga lungsod sa President Carlos P. Garcia.

Lakip sa gitugyan ngadto sa komunidad ang P9.2 milyones nga Evacuation Center nga gipundohan sa Kapit-Bisig Laban sa Kahirapan (KALAHI) sa Department of Social Welfare and Development, isip temporaryo nga kabalhinan sa katawhan nga dili makasalig sa ilang mga pinuy-anan sa panahon sa katalagman.

Kahinumduman nga ang Carlos P Garcia, usa sa mga labing na-apektohan sa pagdagsangs abagyo nga Odette, apan sanglit na isla, wala kayo makagawas ang balita sa ilang kalisud, hinungdan nga napugos ang katawhan nga maningkamot sa ilang kaugalingon nga tinguha nga makasugakod ug makalahutay.

Gitugyan usab sa mga Aumentado ang P7.4 milyones nga Solar Powered Desalination Plant alang sa tubig mainom, didto sa Carlos P Garcia Municipal Hospital sa CPG o Pitogo.

Kahinumduman nga ang local nga tambalanan sa isla nga lungsod, nagsalig pa gihapon sa tubig uwan kon dili na makasuplay ang dyutay nga tubig nga makuha sa mga bomba sa isla, apan, dili gihapon kini kasaligan.

Sukip sa pangandoy sa mga Aumentado, kinsa nagtuo nga ang paghatag mismo sa limpyong tubig mainum, usa na ka pamaagi aron magamhan ang katawhan sa pagpili sa kahimsug ug maayong panglawas, giprograma sa Bohol ang pagpahimutang og planta nga makapahimo og tubig tab-ang gikan sa dagat.

Ug sanglit walay kasaligan nga kakuhaan sa koryente nga mopadagan sa planta, gigamit dinhi ang solar power aron maoy mopa-andar sa makina nga magproseso sa tubig dagat ngadto na sa three stage process nga mamahimong sama sa mineral water ang epekto niini.

Gitunol usab sa taga Kapitolyo ang P5 milyones nga patrol boat nga duhay makina, aron magamit sa Task Force Kalikopan sa pagpatuman sa mga balaod sa panagat sa Coastal law Enforcement Council (CLEC) dinhi.

Ang isla sa CPG maoy kinatumyan sa Danahon Double Barrier Reef, ug gibantug sa daghang matang sa isda, mao nga nahimong labing tambok nga panagatan sa mga kalungsuran nga nagsawo sa dagat dinhi.

Kini usab nga sitwasyon nagpatukmod sa kadaghanan nga maghimo og illegal nga panagat aron makakuha og mas daghan, apan kining paagi kinahanglang lutuson kay makadaut sa kalikopan.

Gitugyan usab sa bahan sa kapitolyo didto sa lungsod ang duh aka mga buildings alang sa duh aka mga tunghaan.

Gitugyan ngadto sa mga opisyales ug magtutudo sa San Jose Integrated School sa Pitogo ang P3.6 M nga duha ka classroom building samtang sa Santo Rosario, lain usab nga P3.6M nga 2-classroom building ang magamit na sa 122 ka mga kabataan gikan sa kindergarten ngadto na sa Grade 10.

Kapins a P28 milyones nga mga pasilidad ang gikatugyan sa kagamhanan sa CPG sa usa lamang ka adlaw, apan ang epekto niini sa kinabuhi sa katawhan, mahimong dili lamang makwenta sa minilyon, kon dili binilyon nga kahigayunan sa katawhan nga makapangita og mas maayong kinabuhi, dili lamang sa us aka adlaw, apan sa umaabut pa. (RAHC/PIA-7/Bohol)

PANGLUTOS SA MGA MALAPASON. Kay usa ka suliran sa mga sakop sa Task Force Kalikopan sa Coastal Law Enforcement Council dinhi ang pagpanggukod sa mga maghimo og illegal nga panagat ilabi na kon ang naghimo sa salaud, suheto sa mga mabaw nga lugar sa mga kadagatan dinhi, us aka shallow draft nga patrol boat nga duhay makina ang gihatag sa Kapitolyo aron maoy magamit sa pagpatuman sa balaod. (PIABohol/CesarCapangpangan)