Pre-registration link sa CPG

Job Fair sa Nob 9, bukas na

TAGBILARAN CITY, Bohol, Oct 10 (PIA)—Bukas na ang pre-registration link sa umaabut nga Carlos P. Garcia Local ug Overseas Jobs Fair alang sa Nobyembre 9, 2024.

Kini maoy kasayuran nga gipaambit sa mga tinugyanan sa Kapitolyo, particular sa Bohol Employment and Placement Office (BEPO).

Ug samtang sayo pa, giaghat ang tanan nga nangita pa og katrabaho-an sa pag-andam sa ilang mga gikinahanglang dokumento: diploma, transcripts of record, medical certificates, police ug National Bureau of Investigation Clearances, ug mga sertipiko sa kasinatian subay sa trabaho nga buot sudlan.

Ang CPG Local ug Overseas Job Fair adto gihapon himoon sa BOhol Cultural Center., Tagbilaran City, Bohol.

Sa usa ka Advisory nga gipagawas sa Bohol Employment and Placement Office ubos sa Buhatan ni Gobernador Erico Aristotle Aumentado, giaghat niini ang mga wala pay trabaho nga andamon na ang mga dokumento, mas mayo nga daghan nga sets ang andamon, kay mahimo nga daghan usab ang companya nga kadusuan niini, sa pag-abut sa adlaw.

Ug samtang na-kompleto na ang mga rekisitos sap ag-aplay, mas mayo usab nga sugdan na ang pag pre-register, aron malista og una og kahatagan na og registration cards alang sa assured nga slots sa fair.

Ang pre-registration link, masulod kon i-click kini nga pre-registration link: https://bit.ly/cpgjobfair2024.

Hinuon, mahimo usab nga mobisita og sayo sa Bohol Employment and Placement Office-Public Employment Service Office (BEPO-PESO) sa ika tulo nga andana sa bag-ong Bohol Provincial Capitol, Tagbilaran City.

Sa dugang kasayuran, sunda ang Bohol Employment and Placement Office-Public Employment Service Office (BEPO-PESO) Facebook page, alang sa dugang mga katikaran niining ipahigayon nga Job Fair. (PIABohol)

APILAN SA MGA AHENSYA. Apilan sa mga ahensya nga may kalabutan sa pagpanarbaho ang kasagaran nga Jobs Faor sa Bohol, mao nga kini gitawag na usab og one-stop shop sa pagpanarbaho, ug kini buksan na usab sa Nob 9. (PIAbohol)