Proyektong Sambayanan ilusad sa Kapitolyo

TAGBILARAN CITY, Bohol (PIA)--Ang Panggamhanan sa lalawigan sa Bohol, sa tinguha nga mapadayon ang kahimtang sa Bohol isip usa ka probinsya nga walay insurhensiya, gitakdang maglusad sa Project Sambayanan.

Si National Task Force to End Local Communist Armed Conflict (NTF-ELCAC) Provincial Coordinator Romeo Teruel nibutyag niining kalambuan atol sa flag-raising rites sa Kapitolyo niadtong Oktubre 14.

Gipasabot ni Teruel nga ang Project Sambayanan makigtambayayong sa League of Municipalities of the Philippines.

Ang Civil Society Organizations, People’s Organizations, ug Associations makig-alayon sa pagmonitor sa mga kalihokan sa tibuok barangay

Dugang pa, usa ka Educational Subsidy Program alang sa mga bata sa Kauban sa Reporma ang ilusad usab aron mapalig-on ang mga paningkamot sa kalinaw ug seguridad.

Gikutlo ni Teruel si LTCOL Magno Mapalad sa 47th Infantry Battalion kinsa nagkanayon nga ang Bohol karon gitan-aw sa tibuok nasud isip template sa anti-insurgency campaign.

Gihisgotan usab ni Teruel ang mga inisyatibo sa probinsya aron mapadayon ang kalinaw ug seguridad pinaagi sa kooperasyon sa multi-stakeholder.

Naglakip kini sa mga caravan sa pagserbisyo, pag-reintegrate sa mga kanhi rebelde sa mainstream pinaagi sa usa ka lokal nga Enhanced Comprehensive Local Integration Program, ug uban pang mga programa nga nagsiguro nga ang mga serbisyo sa gobyerno moabot sa grassroots.

Ubos sa pamunoan ni Gobernador Erico Aristotle Aumentado, kapin sa 70 ka mga kanhi rebelde ang mi-surender ug ang tanang nahibiling aktibong elemento sa armadong Bohol Party Committee nadispatsar.

Ang estratehikong roadmap sa pagdumala nag-una sa kalinaw ug seguridad isip kinahanglanon sa paglambo ug kalamboan sa Bohol. (ecb/PIA7-Bohol)