Ambassador of the Republic of Austria mibisita sa Bohol

TAGBILARAN CITY, Bohol (PIA)--Mibisita sa lalawigan sa Bohol ang Ambassador sa Republic of Austria nga si His Excellency Johann Brieger, ug asawa niini nga si Roswitha Brieger niadtong Nobyembre 5.

Ang Republic of Austria nahimong usa ka iladong kauban sa Kagamhanan sa Probinsya sa Bohol alang sa mga programa sa pagtabang niini og mga proyekto sa kalamboan.

Gipangunahan ni Gob. Erico Aristotle Aumentado ug kauban nila Provincial Administrator Asteria Caberte, Chief of Staff Atty. Filipina Asoy-Piollo, Provincial Planning and Development Office (PPDO)-Head Atty. John Titus Vistal, Bohol Provincial Tourism Office (BPTO)-Head Joanne Pinat, Bohol Economic Development and Investment Office (BEDIPO)-Head Maria Fe Dominise, Department of Education-Bohol Education Program Supervisor Dr. Felix Galacios, ug GO-PAIRS Technical Support Specialist Melvin Salinasal ang diskusyon sa pagpalig-on sa kolaborasyon tali sa Embahada sa Austria ug sa Kagamhanan sa Probinsya sa Bohol.

Gituki sa maong diskusyon ang kalabot sa turismo, pamatigayon, edukasyon, kabag-ohan, ug kalamboan.

Gibuksan ni Aumentado ang dayalogo bahin sa mga kahigayonan sa pagpamuhonan sa Bohol alang sa Austria, nga nagpasalig sa Ambassador nga ang probinsiya giila nga top 2 sa pinakaluwas mga probinsya sa nasud.

Samtang gipaambit ni Caberte ang paningkamot sa Kapitolyo sa paghatag og gahum sa mga lokal nga micro, small and medium enterprises (MSMEs), ilabi na ang industriya sa chocolate cacao isip usa ka potensyal nga panag-uban, isip usa ka estratehiya alang sa pagpatuman sa provincial strategic change agenda.

Gipaambit usab ni Vistal nga ang PPDO adunay estratehiko ug malungtarong andam nga plano sa turismo sa konteksto sa Bohol nga mao lamang ang nag-inusarang UNESCO Global Geopark sa nasud.

Sa kataposan, gipaambit usab ni Dr. Galacios nga ang hustong paglabay sa basura giapil sa kurikulum sa edukasyon.

Si Ambassador Brieger, sa iyang bahin, naghisgot nga ang Austria nagkinahanglan og hanas nga mga trabahante gikan sa Pilipinas nga naglakip sa welding, IT, electrician, ug uban pa. (ecb/PIA7-Bohol)

His Excellency Johann Brieger, Ambassador sa Republic of Austria kauban ni Gob. Erico Aristotle Aumentado atol sa pagbisita niini sa Kapitolyo niadtong Nobyembre 5 diin ilang gituki sa diskusyon ang kalabot sa turismo, pamatigayon, edukasyon, kabag-ohan, ug kalamboan. (PGBh photo)