PAGHANDUM EXHIBIT

CPG ni Amorsolo, matan-aw

Sa National Museum- Bohol

TAGBILARAN CITY, Bohol, Nov 5 (PIA)— Sa mga mahiligin sa arte ilabi na kadtong mga nagtuon sa obra ni National Arrtist for Painting Fernando Amorsolo ug sa gikabaniog niya nga paggamit sa golden light, mahimo na nga Makita sa mga Bol-anon ang duha sa iyang mga orihinal nga obra, diha sa National Museum sa Bohol.

Kini samtang gibuksan sa National Museum Bohol ang “Paghandum,” nga nagpadayag sa koleksyon sa mga handumanan nga nahilambigit sa kinabuhi ni Presidente Carlos Polestico Garcia (CPG), nga gibuksan niadtong ika 128 nga kasumaran sa adlaw nga natawhan sa anak sa Bohol nga giilia nga “most illustrious.”

Gawas sa mga hulagway, kabtangan, mga dokumento, suwat ug mga presidential memorabilia, Makita didto sa museum isip lakip sa mga centerpieces ang duha ka hulagway nga gipinta sa oil on canvas ni Amorsolo niadtong 1957.

Ang hulagway nga gipinta mao ang kang Presidente Carlos P. Garcia ug sa iyang asawa nga si Leonila Dimataga-Garcia, mga makit-an sa ika duhang andana sa National Museum sa Bohol, atbang sa Plaza Rizal.

Gawas sa duha ka dagkong hulagway nga gipapintura ni Amorsolo isip gasa sa mga sakop sa iyang kabinete sa iyang pagka presidente, ang exhibit sa Paghandum usa usab ka halangdon nga pagtamud sa kabilin ni Presidente Carlos P. Garcia, ang sanag ug halangdon nga imahen sa Kasaysayan sa Pilipinas ug usa sa mga gitahod nga anak sa Bohol.

Ang mga talagsaon nga polisiya sa administrasyon ni CPG, ilabi na ang Filipino First Policy ug ang iyang dedikasyon sa kaugalingnans a nasud, kultura ug kapanulundan, angay lamang mahinumduman ug saulogon.

Ang exhibition nga anaa sa National Museum of the Philippines - Bohol magatanyag sa mga Bol-anon ug bisan na gani sa mga langyaw, sa kaihayonan nga masinati ang mga binuhatan sa Bol-anong president, nagdto sa nasud.

Makit-an sa ikaduhang andana sa museum, kini nga paghandum nagpakita sa koleksyon sa mga handumanan ni Presidente Carlos P. Garcia Memorabilia isip gasa ngadto sa nasud pinaagi sa pagpahuwam niini nila ni Maria Carla Josefa G. Campos, Jose Carlos G. Campos, ug Isabel Campos Bustos— ang mga kaliwat ni Presidente CPG.

Ang paghandum, mahimog makit-an nga libre sa National Museum Bohol matag Martes ngadto sa Domingo, alas 9:00 sa buntag ngadto sa alas 5:00 sa hapon. (rahc/PIABohol)

GOLDEN LIGHT. Talagsaon nga estilo sa pagpadayag sa iyang subject ang gihimo ni National Artist for painting Fernando Amorsolo sa iyang pagpakita gad an-ag nga anaa sa abaga ni Carlos P Garcia, nga dagwayg nag padayag sa kabug-at sa gipas-an nga palas-anon sa pagka presidente sa nasud. (RAHC/PIA-7/Bohol)